Celtics kaging sa Nets

CEBU, Philippines - Problema sa ilang depensa maoy nahimong hinungdan nganong mikaging ang Boston Celtics kagahapon sa nagpadayong duwa sa National Basketball Association (NBA) diin nakahimo’g labing dakong upset karon nga season ang nagsangki-ig nga New Jersey Nets sa iskor, 96-104 didto mismo sa TD Garden sa Boston, Massachusetts.

Ang Nets nagdala og 5-52 nga baraha didto sa Celtics sa wala ang duwa ug may 2-27 nga record sa road games apan mikulit og dakong upset batok sa Celtics kinsa mibasol ra usab sa ilang kaugalingon sa ilang kapildehan tungod sa dili maayong depensa.

Tulo ka Nets ang mi-iskor og kapin sa 20 puntos—si Brook Lopez maoy nangu sa iyang 25 puntos, si Devin Harris midugang og 23 puntos ug si Courtney Lee miamot og 21 puntos alang sa Nets kinsa naghupot na karon og 6-52 nga baraha.

Ang Nets mao sab ang naglabaw human sa first period, 29-27.

“Any win for us is big. That’s no question,” matod pa ni coach Kiki Vandegweghe sa Nets kinsa mikahot og 41 ka free throws kung itandi sa Celtics kinsa mi-iskor lang og 11 puntos gikan sa free throw line.

Naanugon ang 26 puntos ni Kevin Garnett alang sa Celtics, ang labing taas niyang iskor karon nga season. Diriyot sab siya mohimo’g double-double pinaagi sa iyang siyam ka assists.

Si Marquis Daniels miposa og 16 puntos alang sa Celtics ug sila si Rajon Rondo ug Ray Allen may 13 ug 10 puntos matag usa ug gikan sa bench, miamot og 13 puntos si Nate Robinson. Wala lang gihapon makaduwa alang sa Celtics si Paul Pierce.

Didto sa Boston kaniadtong Pebrero 5, naglisod sab pagbuntog ang Celtics sa Nets nga didto lang nagdaog sa fourth period diin naka-ipsot gyud ang Celtics sa iskor, 96-87.

Sa laing duwa, kulatado sa Milwaukee Bucks ang Miami Heat, 94-71, midaog ang Indiana Pacers batok sa Chicago Bulls, 100-90, nakabawi ang Memphis Grizzlies human ilang gilubong ang New York Knicks, 120-109, midaog ang Portland Trail Blazers batok sa Minnesota Timberwolves, 110-91, midaog ang Golden State Warriors batok sa Detroit Pistons, 95-88 ug gilubong sa Utah Jazz ang Houston Rockets, 133-110. - GGM gikan sa NBA.com (BANAT NEWS)