CEBU, Philippines - Managlahing kaparalan ang nahiaguman sa duha ka Filipino boxers nga sila si Rodel ‘Batang Mandaue’ Mayol ug Marvin ‘Marvelous’ Sonsona kinsa pulos nangatumba sa ilang sangka kagahapon sa managlahing binyu.
Bisan paman sa iyang pagkalup-og ibabaw sa ring, magpabilin gihapon ni Mayol ang iyang WBC junior flyweight title human miresulta sa usa ka technical draw ang ilang sangka sa Mehikanong si Omar Nino Romero didto sa Coliseo Olimpico de la University of Guadalajara, Mexico.
Samtang ang kanhi WBO super flyweight champion nga si Marvin Sonsona napakyas pagsakmit sa ikaduha niyang world title dihang gipahunong siya ni Wilfredo Vasquez Jr. alang sa WBO light flyweight title didto sa Reben Rodriguez Coliseum sa Bayamon Puerto Rico.
Sa taho sa Philboxing.com, natapos ang kontrobersiyal nga sangka ni Mayol ug Romero, dihang giuwang ni referee Vic Drakulich ang duha ka boksidor human sa duha ka low blows ni Romero ngadto sa Sugbuanong boksidor sa round three.
Apan imbes nga muhunong, kalit lang mibuhi og makusog nga left hook si Romero nga maayong pagkatugpa sa apapangig ni Mayol kinsa nawad-an sa iyang panimuot ug gidala ngadto sa Military Regional Hospital sa Guadalajara.
Human sa maong hitabo, gisangyaw sa announcer si Romero nga maoy midaog pinaagi sa TKO, apan dali kining gibakwi ni WBC vice president Mauricio Sulaiman kinsa maoy mihukom og draw.
Sa iyang bahin, ang 19-anyos nga si Sonsona kinsa nakahiagum sa labing una niyang kapildehan wala musalir sa kaagresibo nga gipakita ni Vasquez Jr. kinsa mipauwan og kinumo ngadto sa ulo ug lawas sa Pinoy boxer.
Ang left-hook sa Puerto Rican ngadto sa bodega ni Sonsona mao ang hingpit nga mitapos sa batan-ong boksidor kinsa wala na makahimo pagbarug sa fourth round.
Sama ni Sonsona, nahanaw usab ang paglaum ni Juanito Rubillar nga mahimong world champion dihang napilde siya ni Hekkie Budler sa usa ka majority decision alang sa IBO junior flyweight title didto sa South Africa. - Lemuel P. Maglinte (BANAT NEWS)