CEBU, Philippines - Usa sa mga sikat nga boksidor dinhi sa Sugbu nga si Z 'The Dream' Gorres gipaubos sa throat operation niadtong Miyerkules sa gabii diha sa Cebu Doctor's University Hospital.
Si Dr. Gary Rivera, usa ka Ear-Nose-Throat specialist, namahayag nga kinahanglan nga operahan si Gorres tungod sa infection sa iyang tutunlan human sa gihimong operasyon didto sa University Medical Center (UMC) sa Nevada, Las Vegas.
Segun sa taho sa abs-cbnnews.com, ang boksidor magpunay og reklamo sa pagsakit sa iyang tutunlan ug sa pag-antos niini sa ubo pipila ka adlaw human siya nahibalik sa iyang pinuy-anan sa dakbayan sa Mandaue.
Si Gorres nauli dinhi sa Sugbu niadtong miaging semana human sa kapin sa duha ka buwan niya nga pagka-hospital didto sa UCM human siya operahi sa utok dihang kalit kining natumba human sa iyang kadaugan batok ni Colombian Luis Melendez niadtong Nobiyembre 13 didto sa Mandalay House of Blues sa Las Vegas.
Sa laing bahin, si Michael Koncz, ang Canadian adviser ni Manny Pacquiao, mipasalig nga ang financial assistance nga gisaad ni Pacquiao ngadto ni Z Gorres mahatag inig human sa iyang away batok ni Joshua Clottey karong Marso 13 didto sa Dallas Cowboys Stadium sa Arlington, Texas.
Matud pa ni Koncz, nga padayon gihapon ang ilang pagtigom og salapi gikan sa fund-raising program nga gipasiugdahan ni Pacquiao nga nakakuha og dakung suporta gikan sa mga Filipino community didto sa Estados Unidos.
Segun sa taho sa boxingscene.com, si Koncz nagkanayon nga human sa away batok ni Clottey, si Pacquiao mao mismo ang motunol sa hinabang ngadto ni Z Gorres. – BANAT NEWS