CEBU, Philippines - Si Eskrima Supreme Grand Master Ciriaco 'Cacoy' Canete ug ang iyang anak nga si GM Dennis molarga ngadto sa Hong Kong sa Marso 9 alang sa usa ka semana nga eskrima demonstration.
Gikan sa Hong Kong, mopahigayon sab sila og laing usa ka semanang seminar didto sa Adelaide, Sydney karong Marso 21 ug sa Wellonggong sa March 26. Gikatakda silang mobalik sa Sugbu sa katapusang bahin sa Marso.
Unya sa Hunyo, si Cañete moadto sa Estados Unidos diin aduna kini labing menos 20 ka imbetasyon alang sa mga eskrima seminars-demonstrations.
Sa iya unyang pagbalik sa Sugbu, doblehon ni Canete ang iyang pagpangandam alang sa Cacoy Doce Pares Mixed Martial Arts unya sa Nobiyembre 13-15 didto sa Mariner’s Court sa ALU-TUCP building sa port area, ning siyudad.
Ang tulo ka adlaw nga seminar nga maglakip sa Hall of Fame awards and promotions unya sa Nobiyembre 14. Mag-demonstrate sab sa mga bag-ong pamaagi sa eskrima, jujitsu ug kickboxing.
Matud ni Cañete, nga adunay labing menos 100 ka eskrimadors nga iyang mga tinun-an ang moduwa sa Sugbu ug kadaghanan kanila gikan sa Australia, New Zealand, Indonesia, Canada, Mexico ug sa America.
Mipahibalo si Cañete, nga karong Marso 1 sugdan na niya ang pictorial alang sa iyang ikalimang libro nga nag-ulohan og “Stick and Dagger.”
Sa laing bahin, tulo ka langyaw'ng eskrimadors ang mikuha’g refresher course didto sa Doce Pares Club ug kini mao sila si Tobias Ricker ug Dino Ramic sa Germany ug si Jai Joshi, 29 sa Britain.
Sila si Ricker ug Ramic mga tinun-an sa International Martial Arts Boxing (IMB) nga tua magbasi sa Frankfurt, Germany, samtang si Joshi nagbansay-bansay didto sa Marter St. James Blackbelt Academy sa London. – BANAT NEWS