Buenavista kampeon sa Century Tuna Superbods Run

MANILA, Philippines - Hindi pinahintulutan ni Eduardo Buenavista na ma­ipagpatuloy ng mga Ken­­yan runners ang pag­do­domina sa mga local ra­ces nang mangibabaw ito sa Century Tuna Superbods Run 2010 kahapon sa Glo­bal City, Taguig.

Ang karerang nilahukan ni Buenavista ay sa 21K dis­tansya at nakaharap nga niya sina Willy Tanui at Willy Rotich ng Kenya ngu­nit nasa pinakamagandang kondisyon ang pambatong runner ng bansa para ma­ka­pagdomina mula sa si­mu­la hanggang natapos ang karera.

“Kondisyon ako dahil tune-up ko ang karerang ito para sa pagsali ko sa Hong Kong Standard Mara­thon next week. Kaya mula sa simula ay ako ang nagdikta ng pacing at hanggang natapos ay ako ang na­ngu­nguna,” ani Buenavista na naorasan ng 1:08:18.

Tinalo niya si Tanui na may­roong 1:10:13 na mas ma­bilis lamang ng limang segundo sa kababayang si Rotich (1:10:18).

Ang panalo ni Buena­vista ay nagkahalaga ng P42,000 habang nakontento ang dalawang Kenyans sa P21,000 at P10,500 gan­timpala.

Si Maricel Maquilan na­man ang nagdomina sa kababaihan nang talunin sina Nhea Ann Barcena at Aileen Tolentino sa naitalang 1:28:29 tiyempo.

Sina national athletes Rene Herrera at Mercedita Manipol-Fetalvero ay nagpasikat din nang kanilang wa­lisin ang 10K titles.

Si Herrera ay naorasan ng 35:49 upang talunin sina Alquin Bolivar (35:55) at Cristabel Indapan (36:16) habang si Fetalvero ay nag­­sumite ng tiyempong 40:20 upang hiyain sina Ellen Tolentino (40:25) at Janet Lumibao (40:40).

Nanalo naman si Ge­rald Sabal (16:08) kina Jujet De Asis (16:30) at Ben Alejandrino (16:32) sa 5K men habang si Serenata Saluan (27:13) ang nagkampeon sa kababaihan matapos da­igin sina Merlyn Lumag­bas (27:17) at Corazon Sal­cedo (27:20). Sina Roger Genolo at Christine Delfin naman ang nagdomina sa 3-K races. (Angeline Tan)