Losiaboi napilde na gyud

CEBU, Philippines - Sa labing unang higayon napilde na gyud ang Kenyan nga si Simon Losiaboi sa lumba dinhi sa Sugbo tungod sa usa ka disqualification atol sa 2nd Cebu Rotary Run kagahapon didto sa SM City-Cebu grounds.

Si Losiaboi ang unang miabot sa finish line sa oras nga 51:48.52, apan napunta ngadto ni Mendel Lopez ang titulo human nakahimo’g kalapasan si Losiaboi pinaagi sa pag-ilis sa iyang race number nga wala nagpahibalo ngadto sa technical committee sa lumba.

Ang sakop sa RP Team nga si Lopez mitapos sa lumba sa oras nga 52:8.02, gisundan ni Jess Gonzaga ug Paul James Zafico isip second ug third placer sa 15K men’s open.

Sama sa gihapon, ang taga-Zamboanga nga si Mary Grace de los Santos kinsa pabiling wala'y pilde sa tanang lumba nga iyang gisalmutan dinhi sa Sugbu, maoy midominar sa 15K women’s open sa oras nga 1:02:51.87.

Si De los Santos gisundan ni Madelyn Carter sa oras nga 1:06:19.98 sa ikaduhang dapit, samtang si Milagros Tanudtaud maoy mipahiluna sa ikatulong dapit sa oras nga 1:24:07.67.

Sa 15K executive division, midaog si Steven Ferraren sa oras nga 1:16:55.27, gisundan nila ni Raymond Bontol (1:18:46.95) ug Gandhi Truya (1:19:13.44) sa ikaduha ug ikatulong luna.

Ang taga-Davao nga si Elmer Bartolo nga midagan sa mas mubo nga rota, milabni sa titulo sa 7K category sa oras nga 24:68.30. Si Reprinel Banzon (25:00.72) ug Jobert Carolino (25:4.97) maoy second ug third placer. - Lemuel P. Maglinte (BANAT NEWS)