Vargas 3 rds ra ni Donaire

CEBU, Philippines - Ang 1-2 kombinasyon nga gitapos og mahait nga upper-cut gikan ni Nonito “The Filipino Flash” Donaire mao ang mitapos ni Mexican challenger Manuel “Chango” Vargas sa round 3 sa main event sa Pinoy Power 3/ Latin Fury 13, kagahapon didto sa Hilton sa Las Vegas.

Sa makausa pa, gipamatud-an ni Donaire nga usa siya sa labing ngilngig nga boksidor sa 115 lbs. division human way kukaluoy niya nga gidabo-dabohan si Vargas kinsa wala na makabarug human kini nahayang sa naghinapos nga 1:40 sa ikatulong round.

Si Donaire kinsa milampos pagdepensa sa iyang WBA interim super flyweight title sa labing unang higayun mipalambo karon sa iyang record ngadto sa 23-1, 15KOs, samtang si Vargas kinsa nakahiagum sa ikaduha niyang kapildehan, una batok ni ALA Boy Donnie Nietes, nahagsa ngadto sa 26-5-1, 11KOs.

Ang 28-anyos nga Mehikano mao ang last minute replacement alang sa iyang kababayan nga si Gerson “El Nene” Guerrero kinsa wala makaduwa sa maong boxing card human mahagbung sa eye examination tungod sa gisi sa retina sa walang mata niini.

Apan sa laing bahin, wala'y swerte ang mga Pinoy bantamweights nga sila si Gerry Peñalosa ug Ciso Morales human sila nangapukan batok sa tagsa-tagsa nila ka mga kaatbang sa undercard.

Wala na makalahutay pa si Morales dihang usa ka bangis nga body shot gikan ni WBO bantamweight champion Fernando Montiel, ang mipatumba kaniya sa 2:06 sa opening round.

Samtang bisan paman sa iyang gipakitang kaisug, nakabsan gihapon ang two-division world champion Peñalosa nga maangkon ang kahigayunan nga mo-away alang sa world bantamweight title human siya gipilde ni Eric Morel pinaagi sa split decision.

Nakahiagum og dakung gisi sa kilay si Peñalosa human sa accidental headbutt nila ni Morel sa round 5, apan bisan paman sa padayong pag-agas sa dugo sa mata ni Peñalosa wala gihapon kini muhunong og sukmag batok sa Puerto Rican. Human sa away duha ka mga hurado ang miiskor og 115-113 ug 116-112 pabor ni Morel, samtang ang usa mihatag og 115-113 alang ni Peñalosa.

Mibandera hinuon og daog alang sa nasud ang ALA boy nga si Mark Jason Melligen dihang miiskor kini og usa ka sixth round TKO batok sa kanhi undefeated nga si Raymund Gatica, samtang si Bernabe Concepcion midaog via unanimous decision batok sa Puerto Rican nga si Mario Santiago. - BANAT NEWS