Mactan Hotmen daog

CEBU, Philippines - Mipabuhagay og 14 puntos si Marvin Sillar sa fourth quarter samtang ang foul-troubled nga kanhi UC Webmasters skipper nga si Kenneth Kern Sesante milahutay bisan sa iyang upat ka fouls aron pangulohan ang Mactan Hotmen sa iyang 21 puntos alang sa ilang yanong paglampurnas sa Assessment Division sa iskor, 108-85 atol sa pagbukas sa Bureau of Customs 1st Port of Cebu 2010 Sportsfest basketball tournament kaniadtong Biyernes sa gabii didto sa Mandaue City Sports and Cultural Complex.

Ang Hotmen biya pa og dos puntos human sa third period, 71-73 apan dihang gipasulod na sila si Sillar, Ronnie Clapano ug ang starting guard nga si Jessie Bugtai, nasakmit dayon nila ang labaw nga gihuptan sa Assessment kapin og tulo ka kwarter ginamit ang mainitong 37-12 nga rally alang sa 23-puntos nga kadaogan.

Si Sesante kinsa gipasulod sa second period, nakahimo’g upat ka fouls ug gipalingkod og dugay aron siya masalbar gikan sa disqualification apan mao lang gihapon ang nangu sa opensa sa Hotmen.

Ang Assessment ubos sa ilang team leader nga si Cash Division chief Rady Abarintos ug ni coach Arnaldo Ciabo, ang kanhi point guard sa SWU Cobras, mao kanunay ang naglabaw sa kinatibuk-ang first half ug may 27-12 nga abante sa first period luyo sa nagpungasi nga puntos gikan nilang ex-SIT Skyblazer Tata Laborte, Noel Medalle ug Bikeng Rollon apan nakarekober lang gihapon sa kadugayan ang Hotmen kinsa nag-anam og sikit pagsugod sa second period.

Si Ronnie Ruiz maoy mitabla sa duwa sa labing unang higayon sa iskor, 71-all may 14 segundos ang nahibilin sa third period ug ang three-pointer ni Bugtai sa ibabaw sa foul line nga maoy naghatag sa Hotmen sa labing una nilang labaw, 80-78 sa tunga-tungang bahin sa fourth.

Misikit sa kataposang higayon ang Assessment human sa usa ka free throw ni Daniel Enriquez, 79-80 apan human niadto gibiyaan na sa Hotmen daw bunot ang Assessment.

Ang Hotmen team leader nga si Collector Bingo Matugas mi-iskor og nuybe puntos gikan sa tulo ka triples sa first period apan namugnaw didto sa fourth period.

Si Laborte kinsa wala kapugngi sa first period maoy nangu sa Assessment sa iyang 25 points, upat niini ang triples samtang si Enriquez nga usa sa mga UC Webmaster reserves midugang og 12 puntos ug sila si Medalle ug Rollon parehong may 11 puntos.

Ang duwa nga nahimong one-sided sa fourth period, nahimo sab nga physical dihang nagkainitay sila si Dondon Cadungog sa Assessment ug Pepito Mata sa Hotmen nga diriyot moresulta sa panag-away.

Sa wala pa magsugod ang duwa, ang Assessment maoy misakmit sa Best in Uniform award.

Sa laing bahin, ang kasamtangang Miss CESAFI sa collegiate division Miss Sharon Mae Angel maoy napiling Miss Port of Cebu diin siya ang representante sa Enforcement Security Services (ESS) ubos ni Captain Jerry Arizabal.

Ang second placer mao si Miss Crystal Star Aberasturi sa Pimentel Brokerage ug ang third placer mao si Stephannie Cummins sa Port Operations Division (POD).

Ang Hotmen ni coach Romy Cal kinsa maoy kampiyon sa miaging tuig sa torneyo sa Customs, maoy paborito alang sa korona.

Puntos matag usa:

Mactan Hotmen (108)— Sesante 21, Sillar 14, Clapano 14, Matugas 9, Yu 8, Mata 7, Bugtai 7, Ruiz 6, Ararao 6, Amores 5, Jayme 5, Ambrad 4, Maningo 3

Assessment (85)— Laborte 25, Enriquez 12, Medalle 11, Rollon 11, Cadungog 8, Urbina 6, Quiño 4, Bacalla 2, Lopez 2, Barte 2, Trinidad 2. - Gabby G. Malagar (BANAT NEWS)