1st QUOTA International Run gitakda

CEBU, Philippines - Andam na ang tanan alang sa 1st QUOTA International 12K Class and 6K Run nga gikatakda karong Marso 7 diha sa The Terraces sa Cebu Business Park.

Ang lumba gibuak ngadto sa duha ka dibisyon -- 12K (Open) ug 6K (Open).

Sa press conference kagahapon didto sa Sunburst Restaurant-Mango Avenue, si Quota International-Talisay Chapter president June Chiongbian mipahibalo nga plansado na ang tanan alang sa gipasiugdahan nilang lumba.

Matud ni Chiongbian, nga dul-an 1,000 ka runners ang mosalmot sa maong lumba. Dugang pa ni Chiongbian nga may 500 na ka entrante ang nagparehistro.

Si race director ug The Freeman sports columnist Raffy Uytiepo, nagkanayon nga gipalay-an nila gikan sa naandang 5K ug 10K ang lumba aron malingaw ang mga season runners.

Gibutyag ni Uytiepo, nga si Kenyan Simon Losiaboi ug Cebu City Marathon second placer Mary Grace delos Santos gituhoang maoy mosakmit sa korona sa tagsa-tagsa nila ka kategoriya.

Ang makampiyon sa 12K Open makadawat og P6,000, ang second placer makaangkon og P4,000 ug ang third placer mobulsa og P2,000.

Sa 6K Open, ang top three finishers makadawat og P3,000, P2,000 ug P1,000 matag usa.

Gitug-an ni Chiongbian nga ang salapi nga ilang matigom sa lumba itabang alang sa kabataan nga adunay deperensiya sa pandungog, panan-aw ug ingon man mga amang. Lakip   sa ilang mga beneficiaries mao ang Tabunok Central School, Lamacan Elementary School ug Sibonga.

Ang registration fee nagkantidad og P200 libre na niini ang singlet ug ang registration areas mao ang Philippine Sports Commission (PSC)-7 sa Cebu City Sports Center, Casa Ilongga sa Robinson’s Place ug Runnr sa Ayala Center Cebu. – BANAT NEWS