CEBU, Philippines - Nakasulod na sa semifinals ang Comfa General Merchandise ni team owner Ely Gomos human nila gilubong ang Janrymul, 92-75 sa LLBA-ABA Fiesta Cup 2010 basketball tournament sa Barangay Agus Gym sa dakbayan sa Lapu-Lapu.
Nabitin og tres puntos ang Comfa sa halftime, 42-45, apan kalit kining nanginit sa third period sa pagtambayayong nilang Boboy Ciriaco ug Archie Ompad aron pagposte og 17 puntos paghuman sa maong kuwarter, 74-57. Ilang namintinar ang double digits nilang labaw hangtod nga nahurot ang oras sa duwa.
Ang Comfa nga adunay 6-0 nga baraha gipangulohan ni Ciriaco, kinsa mikimada og 20 puntos, gisundan ni Ompad sa iyang 18 puntos. Ang pilderong Janrymyl gipangulohan sab ni Rene Daño nga mibahog og 24 puntos, si Bagasbas miamot og 20 puntos, samtang si Digo Tampos miabuno og 10 puntos.
Sa laing duwa, ang VKK mikulit sa ilang ikatulong daog human gipilde ang John-Mar, 86-81.
Sakit kaayo ang kapildihan sa John-Mar kay kanunay kining naglabaw gikan sa pagsugod hangtod sa katapusang tres minutos sa final period.
Si Sammy Lapoja maoy nangu sa rally pinaagi sa iyang tulo ka 3-pointer aron ilogon ang labaw ug wala na kini molingi pa sukad niadto.
Si Dignos maoy nangu sa VKK pinaagi sa iyang 17 puntos, gisundan nilang Lapajo ug Buldog Ybañez nga parehong mikabkab og 13 puntos, samtang sila si Timor Portaguliza ug Silawan mitimang og 10 puntos matag usa.
Ang napildeng John-Mar gipangulohan sab ni Alian, kinsa mibugha og 15 puntos, samtang si Michael Quijano misiak og 11 puntos. Sila si Billy Nadado ug Paolo Villamor miratsada og 10 puntos matag usa alang sa John-Mar nga wala pay daog sud sa tulo ka duwa.
Mihimo sab og milagro ang Ave Maria/X-Men pinaagi sa paglubong sa San Remigio sa iskor nga 76-67.
Sa laing bahin, ang Barangay Agus Sinulog Competition himuon karong Pebrero 16 diha sa sports gym sa maong barangay.
Ganting salapi ang nagpaabot alang sa top three winners. Ang kampiyon makadawat og P20,000, ang 2nd placer makaangkon og P15,000 ug ang third placer mobulsa og P10,000.
Alang sa dugang mga kasayoran, kontaka si Janet Igot (4935808) ug ang Janrymyl Bakeshop (4940426).
Gipaluyohan kini sa Regene Pacific College, Diosing, Sergio Sagarino, Agus Brgy. Capt. Jovencio Lauron ug barangay officials. – BANAT NEWS