CEBU, Philippines - Dugang medalya ang nahakot sa Cebu City Niños human sa ikatulong adlaw sa 2010 Central Visayas Regional Athletic Association (CVIRAA) Meet kagahapon didto sa Ramon Durano Sr. Memorial Sports Complex sa Danao City.
Ang Niños mikabkab og 10 ka golds, 10 ka silvers ug unom ka silvers kagahapon.
Upat sa 10 ka golds nga nakuha sa Niños kagahapon gikan sa athletics pinaagi nilang Daisy Mae Lawas ug Roy Villahermosa sa 400m hurdles nga mirehistro og 1:12.51 ug 59.67 ug gikan sa triple jump kortesiya nilang Kristie Kaye Vinco ug Ivan Castañeda.
Si Leif Uriel Iyas nakakuha sab og bulawan alang sa elementary athletics squad pinaagi sa triple jump sa iyang 10.33.
Laing upat golds nabira sa gymnastics sa elementary men's artistic gymnastic team nga nidaog sa team event, Jesus Saragoza sa MAG floor exercises, Francin Coyoca sa WAG's balance beam ug Desirei Padilla sa floor exercises.
Sa laing bahin, gipamatud-an ni Daniel Noval sa Mandaue City nga seryoso siya sa pagpanalipod sa iyang titulo dihang iyang gibuak ang kaugalingon niyang rekord kagahapon.
Si Noval, kinsa maoy labing kusog atol sa 2009 Palarong Pambansa didto sa Tacloban mibuak sa iyang personal best nga natala atol sa miaging Palaro gikan sa 11.04 segundos ngadto sa 10.91 sa 100m action.
Gawas sa 100m gold, si Noval nidaog sab sa 200m run, apan mas hinay kini itandi sa iyang oras sa Palaro nga 11.04 human kini mi-oras og 22.90 kagahapon.
Si Noval, kinsa milangkat og duha ka bulawan sa 1st Milo Little Olympics National Championships mao gihapon ang numero unong pambato sa athletics sa alang sa rehiyon.
Sa pikas bahin, si Mary Ann Mabansag sa Talisay City mao sab ang labing kusog sa oras nga 13.30.
Sa elementary division, si Angel Rosas (14.09) sa Cebu Province ug Zanos Edward Tayera (13.28) sa Bohol maoy nag-una sa girls ug boys' 100m run. – BANAT NEWS