CEBU, Philippines - Gitamparos og 91-75 nga kapildihan sa Hapee-Online ang Springdale atol sa ilang panag-abot sa Sinulog Cup basketball tournament didto sa Springdale Gym sa Brgy. Lahug, ning siyudad.
Ang Hapee-Online luyo sa liderato ni reigning Jr. NBA ug CESAFI MVP Mark Jayven Tallo, sayong nanginit og mikulit dayon kini og 15 puntos nga labaw paghuman sa unang 10 minutos sa duwa.
Wala hinuon magmika ang Springdale ug mi-rally kini sa second quarter aron laslasan ang labaw ngadto na lang sa tres puntos sa halftime, 32-35.
Apan mao ra kadto ang nindot nga nahimo sa Springdale kay ang Hapee-Online daling nakarekober pinaagi sa ilang walay hunong nga atake hangtod na sa pagkulit og 16 puntos nga kadaugan.
Si Richcres Nwanaka, maoy nangulo sa Hapee-Online pinaagi sa iyang 27, samtang si Tallo mi-ariya og 20 puntos.
Ang pilderong Springdale gipangulohan sab ni Jeff Go sa iyang 25 puntos.
PUNTOS MATAG USA
Hapee-Online (91) - Nwanaka 27, Tallo 20, Aguire 10, Nalos 9, Dinsay K. 6, Dela Cruz 4, Guillen 4, Bayno 4, Tacbobo 4, Dinsay J. 2, Empleo 2
Springdale (75) - Go J. 25, Mercado 16, Zuluaga 11, Quintos 9, Go Z. 6, Holasca 5, Adolfo 3 (BANATNEWS)