CEBU, Philippines - Kapila na motuyok ang katuigan, apan hangtod karon wala pa gihapon matay-i ang abilidad sa beteranong rider Edmund Pingkian ug pabiling masilakon aron paghari sa Wanggits division sa 1st Keiz BJ Motocross Series nga giulohan og Hon. Zigfred Povadora Duterte Habal-Habal and Wanggits Showdown didto sa Cauawan, Tabogon sa amihanang Sugbu.
Sa iyang pagbalik sa aksiyon, si Pingkian, ang managing head sa Mandaue Sunriser Manufacturing Corp. mihimo og katingalahan pinaagi sa pagpukan sa laing tang-ang riders nga sila si Jun Pestaño ug Rowel Maraño aron dad-on ang korona sa Wanggits category.
Si Pestaño, ang DepEd District Supervisor sa San Remigio 2 maoy mipahiluna sa ikaduha nga dapit, samtang si Maraño maoy mi-okupar sa ikatulo.
Mikompleto sa top five mao sila si Sammy Largosa ug Kubol Gahi.
Sa laing bahin, si Tata Ursabia mao sab ang milangkat sa titulo sa Habal-Habal category. Iyang gipukan silang Marlon Navares ug Renan Cabiao nga nahimutang sa ikaduha ug ikatulo nga dapit. Sila si Daryl Jumao-as ug Rick Ryan Martinez maoy mikapyot sa ikaupat ug ikalima nga dapit.
Si Felipe Montejo, mikadlit sab aron pagposte og dobleng kadaugan pinaagi sa paghari sa Executive A ug B.
Sila si Noli Rom, Jonathan Tapaya, Titing Sicad ug Richard Ferminoff mipahiluna gikan sa ikaduha hangtod sa ikalima nga dapit sa Executive A ug B.
Sa mini class, si Earl Jean Brylle Ornopia maoy milangkat sa kampiyonato human gipilde ang iyang manghod nga si Ken Kerry Jean. Si Tamtam Largosa maoy miangkon sa ikatulo, samtang sila si Kerry Keizer Ornopia ug JK Enriquez nalandig sa ikaupat ug ikalima nga dapit.
Wala hinuon magmahay si Ken Ornopia kay miuli kini bitbit ang championship trophy dihang iyang gidominar ang Peewee division, gisundan sa iyang manghod nga si Kerry Keizer, kinsa mipahiluna sa ikaduha ug JK Enriquez nga mikapyot sa ikatulo nga dapit.
Ang usa ka adlaw nga kompetisyon nga gipasiugdahan sa Keiz BJ Motors ni Siegfred Ornopia, gisuportahan sab sa Sunriser Motorcycles. (BANATNEWS)