7th Thirsty Cup mosikad na

CEBU, Philippines - Kapin sa 200 ka koponan ang mopakita’g aksiyon sa 7th Thirsty Cup football tournament nga mosikad na karong adlawa diha sa Cebu City Sports Center (CCSC) oval.

Ang tulo ka adlaw nga torneyo gibahin-bahin ngadto sa 14 ka dibisyon -- men’s open, ladies open, 36-above, 40-above boys 19, 6 , 8 ug boys and girls 12, 14 ug 17.

Ang men’s open maoy    labing daghang mga entrante nga adunay 53, gisundan sa boys 17 ug 10 nga adunay 28 ka mga koponan.

Ang Abellana National School (ANS)-Pomeroy ni coach Francis Ramirez modepensa sa ilang titulo sa boys 17 ug 19 divisions. Ang ANS boys 17 squad nga maoy kampiyon sa labing unang Milo Little Olympics National Finals niadtong miaging Nobiyembre gibuak sa duha ka koponan.

Modepensa sab sa ilang titulo ang ANS boys 19 batok sa tulo ka koponan nga mao ang Ma. Montessori School, MZED ug HCA sa Tubigon Bohol.

Apan sukwahi sa ANS boys 19, mag-atubang og lisud nga tahas ang ANS boys 17 kay adunay 13 ka koponan ang nagtinguhang mopakgang sa ilang tinguha. Kini naglakip sa Don Bosco Technological Center (DBTC) ug Foundation University (FU) sa Dumaguete City.

Sa boys 14, ang ANS makigtigi sa defending champion DBTC, San Carlos City Negros Football Club, Siliman University ug FU.

Laraw usab sa University of San Carlos (USC) nga mosakmit og back-to-back title sa men’s open, samtang ang San Roque Royal United ug Hiroshi Football Club mao ang mangulo sa 36-above ug 40-above categories.

Gawas sa bisitang mga koponan gikan sa Iligan, Tacloban, Leyte, Tanjay, Dumaguete, Bohol, Bacolod ug San Carlos City, gilauman usab nga mosalmot ang mga European ug African teams nga dinhi nagbasi sa Sugbu.

Ang mga mananaog sa matag dibisyon makadawat og tropeyo ug medalya. – BANAT NEWS