CEBU, Philippines - Temporaryong nag-una sa liderato ang Sugbo Customs Brokerage ug ang Dark Green human gipilde ang tagsa-tagsa nila ka kaatbang sa nagpadayong Still Fighting Athletics Association (SFAA) 2010 basketball tournament diha sa CEC covered court sa dalan Dimasalang.
Ang Sugbo Customers Brokerage misakmit og daog batok sa Yellow team sa iskor nga 84-83, samtang ang Dark Green mi-iskor og 70-65 nga kadaugan batok sa Red team.
Sa maong kadaugan, ang Sugbo Brokers ug Dark Green nag-una sa liderato sa ilang 6-1 win-loss records.
Ang small forward nga si Arnold Fernandez ug si Kenneth Babad maoy nangu sa Sugbo Brokers sa ilang 30 ug 21 puntos matag usa. Si Jerome Radaza maoy nangu sa Yellow team pinaagi sa iyang 36 puntos.
Sa laing bahin, ang Dark Green gipangulohan nilang Rex Domien ug Rick Dayondon nga nagkumboya og 31 puntos. Si Chris Dabatos maoy nangu sa Red team sa iyang 17 puntos.
Sa lain pang mga duwa, ang TNT ni skipper Tony Piloton midemolis sa Young Birds sa iskor nga 59-41, samtang ang Scarborough mipukan sa SWAN-RTW,82-69 ug ang Warriors milubong sa ZAON, 99-63.
Ang TNT naghupot karon og 5-2 nga baraha, samtang ang Young Birds nahagsa ngadto sa 4-3. Ang Scarborough, SWAN ug ang Warriors parehong adunay 3-4 win-loss records.
Si Ricky Misa miposte og 31 puntos alang sa Scarborough, samtang si Bert Genovisa mipana og 21 puntos alang sa Warriors.
Puntos Matag Usa
Unang duwa:
Sugbo (84) - Fernandez 30, Batad 21, Morre 11, Dinela 7, Bongon 6, Romariz 4, B. Bongon 2, Olorvida 1
Yellow (83) - Radaza 36, Godinez 12, Ando 8, Caballero 8, Nalayog 8, Abac 5, Kue 4, Ceballos 2
Ikaduhang duwa:
Dark Green (70) - Domien 16, Dayondon 15, Emol 12, Navarro 8, Vanguardia 8, Guerrero 3, Abonilla 3, Torrevillas 3, Pareja 2
Red (65) - Dabatos 17, Garcia 11, Quilente 8, Pancho 8, Cabangbang 8, Mahawan 7, Bejaresco 4, Makinano 2. – BANAT NEWS