Los Amigos kaging sa DARUSBA sa CGBL

CEBU, Philippines - Mikulit sa labing una nilang daog sulod sa tulo ka duwa ang Danao Ruby Stars Basketball Association (DARUSBA) human ilang gipakuratan ang Los Amigos Basketball Association (LABA) sa iskor, 88-81 kaniadtong Sabado sa gabii sa nagpadayong Cebu Golden Basketball League (CBGL) basketball tournament didto sa Inayawan Sports Complex.

Sa laing duwa, gikunis-kunis sa Power Forty Selection ang nagsukarap nga Naga Above Forty Basketball Association (NAFBA) sa usa ka high-scoring game, 138-107 aron pabiling huptan ang solong liderato sa ilang 4-0 nga baraha.

 Wala kapugngi sila si Rowen Capoy ug Joel Castaneda kinsa maoy nangu sa opensa sa DARUSBA sa ilang 29 ug 27 puntos, matag usa.

Mao kadto'y labing una nilang daog aron paghupot og 1-2 nga baraha ug ang tanang unom ka team pulos na mikulit og daog.

Tungod sa maong kapildehan, ang LABA midailos na ngadto sa 2-1 ug nakigtabla tali sa Minglanilla Basketball Association (MIBA) alang sa ikaduhang pwesto. Si Pablo Yu maoy nangu sa LABA sa iyang 23 puntos.

Sa laing bahin, nagmangtas si Cesar Ortega sa undergoal ug wala bisan usa gikan sa NAFBA ang nakapiog kaniya aron pangulohan ang Power Forty pinaagi sa iyang 28 puntos ug gisundan siya ni Atty. Flor Yosores kinsa mihakot og 18 puntos samtang laing lima ka kauban pulos mi-iskor og double figures.

 Ang NAFBA kinsa midailos na ngadto sa 1-3 nga baraha, gipangulohan ni Celio Repuesto kinsa miburak og 24 puntos. Nagtabla na sab sila karon tali sa Better Run Basketball Association (BRBA).

Puntos matag usa:

First Game:

DARUSBA (88)—    Capoy 29, Castaneda 27, Banzon 11, Murillo 6, Cabahug 6, Almacin 3, Batac 2, Tapia 2, Manulat 2

LABA (81)—            Yu 23, Lopez 17, Pangan 15, Rizane 11, Unabia 6, Evangelista 6, Lee 3

Second Game:

Power Forty (138)—     Ortega 28, Yosores 18, Bughao 16, Gacayan 16, Arias 16, Dajalos 13, Gajudo 13, Eleguin 8, Dela Rama 6, Vernaiz 4

NAFBA (107)—          Repuesto 24, Panilag 18, Gentapa 18, Miruel 14, Flores 10, Medalla 5, Dablo 3, Aliganga 2. - Gabby G. Malagar (BANAT NEWS)