PTT-UV, AVM- USJR Daog

CEBU, Philippines - Gidabodabohan sa PTT Fuels-UV Baby Lancers ang San Marino Corned Tuna-USC Baby Warriors sa fourth period ginamit ang nagpungasi nga opensa aron mo-iskor og 67-50 nga kadaogan kagahapon sa sangka sa juniors division sa nagpadayong CESAFI Partners' Cup didto sa Cebu Coliseum.

Ning pagsuwat, padayon pang nanikaysikay ang PTT Fuels-UV Lancers batok sa Warriors samtang nakigtigi sab sa abilidad ang Ave Maria-USJR Jaguars batok sa Prime Asia-Don Bosco Greywolves.

Sa sayo pa, ang Ave Maria-USJR Baby Jaguars mikulit sab sa ilang ikaduhang daog human ilang gisumpo ang rally sa Prime Asia-DBTC Greywolves sa naghinapos nga oras aron modaog sa iskor, 72-67.

Ang Baby Lancers kinsa naghupot na karon og 2-1 nga baraha human mapilde sa Enervon C-UC sa opening day sa miaging semana, misugod pagbiya atol sa third period apan wala sila molampos tungod kay mosikit gyud ang Baby Warriors ug mihulga kini sa iskor, 37-42 may 2:32 ang oras ug naputol lang kini human sa duha ka three-pointers sa Baby Lancers nga maoy nagduslit sa nag-aso nga opensa.         

Samtang nagka-upos ang oras, nag-anam sab og kasayon alang sa Baby Lancers pagpugnit og puntos ug sukwahi kini sa Baby Warriors kisang opensa kalit lang miaslom ug usahay mosipyat pa gani sa duol nga tirada.

Ang Baby Lancers naglabaw og 20 puntos, 65-45 sa kataposang dos minutos ug wala na makasustenir ang Baby Warriors.

Si Francisco Arong, Jr. mihipos og 12 puntos alang sa Baby Lancers ug wala'y bisan usa sa habig sa Baby Warriors nga mihimo'g labaw sa siete puntos.                       

Sa laing bahin, si Clint Muñez maoy mibaswat sa Baby Jaguars batok sa Junior Greywolves kinsa mihulga pag-iskor og upset.           

Si Muñez minurak og 20 puntos alang sa 2-0 nga Baby Jaguars samtang si Benjie Trozo midugang og 11 puntos.

Puntos matag usa:

First Game: (Juniors)

Ave Maria-USJR (72)—    Muñez 20, Trozo 11, Torrecampo 8, Autentico 6, Alob 5, Escatron 4, Montecillo 4, Senining 3, Go 2, Legaspi 2, Tan 2, Mate 2, Eborlas 2, Senining 1

Prime Asia-DBTC (67)—    Hugo 10, Villaroza 9, Abelgas 6, Tabasa 6, Mellisor 5, Escario 4, Nemenio 3, Yap 3, B. Ruiz 3, Pono 3, Castor 3, Haben 2, Niere 2

Second Game: (Juniors)

 PTT Fuels-UV (67)—         Arong 12, Legarde 9, Brigoli 7, Mendoza 6, Linao 6, Smith 6, Flores 6, Ybañez 4, Dennison 3, Nuñez 2, Undaloc 2, Regner 2, Marata 2

San Marino-USC (50)—      Kiruchi 7, Malana 6, Asotigue 6, Ortega 5, Jaca 4, Palapar 4, Bogo 4, Dalangpan 3, Bacaltos 3, Romaguera 2, Arnejo 2, Pajantoy 2, Uy 1, Guardiario 1. - Gabby G. Malagar (BANAT NEWS)