Kalimasada, Eskrima maghugpong

CEBU, Philippines - Magbinayloay sa ilang mga estilo ug disiplina ang Arnis Eskrima ug Tetada Kalimasada, ang duha sa mga karaang martial arts clubs dinhi sa Pilipinas.

Atol sa Sports Communicators Organization of the Philippines (SCOOP)-Forum kagahapon diha sa Baseline Restaurant, nag-abot ang mga kadagkuan sa duha ka martial arts clubs aron ipaambit ang tagsa-tagsa nila ka mga pagtulon-an aron mapalambo pa ang duha ka matang sa Pinoy martial arts.

Si Dr. Silvano Marana, kanhi Regional Director sa TESDA-Visayas ug usa ka instructor sa Tetada Kalimasada, nagkanayon nga plano nila nga tun-an ang Eskrima diin mamahimo nilang mapalambo ang ilang martial arts pinaagi sa pagkuha sa mga estilo sa Eskrima.

Ang Tetada Kalimasada, usa ka matang sa martial arts ug ehersisyo nga mogamit sa enerhiya sa lawas aron panalipdan ang ilang kaugalingon.

Sa usa ka demonstration kagahapon, gipakita sa mga sakop sa Tetada Kalimasada ang ilang abilidad sa pagbuak sa botelya gamit ang enerhiya gikan sa ilang kamot.

Gihangop usab kini ni Doce Pares International Grandmaster Dionisio 'Dionnie' Cañete, kinsa mipakita sa daku niyang suporta sa Tetada Kalimasada, nga sama sa Eskrima nahimo usab nga kabahin sa kultura sa martial arts sa Pilipinas.

Sa laing bahin, gipahibalo ni Grandmaster Cañete nga nangandam na sila karon alang sa nagsingabot nga World Eskrima Kali Arnis Federation (WEKAF) International championship didto sa Mexico City.

Matud pa ni Grandmaster Cañete nga magpili sila og 96 ka mga eskrimadors, 48 niini gikan sa Visayas ug Mindanao area ug 48 gikan sa kaulohan aron morepresentar sa nasud.

Ang Cebu maoy mo-host sa qualification tournament alang sa Vis-Min area karong Marso 7 sa wala pa matinong binyu. – BANAT NEWS