Mandaue City boxers daku'g paglaum

CEBU, Philippines - Daku'g purohan ang mga boksidor sa Mandaue City nga mokabkab og bulawang medalya sa nagpadayong 2010 National Youth Amateur Boxing Championship didto sa Puerto Princesa, Palawan.

Sila si Richard Rama, Rommel Tuñacao, Rheson Tarona ug Jeffrey Stella mipakita og maayong labok bisan og mao pa kini ang una nilang pagsalmot sa National Championship.

Ang upat ka boksidor maoy pambato sa Mandaue alang sa national competition tungod sa impresibo nilang performances sa miaging Mayor Jonas Cortes Amateur Boxing Series.

Si Tarona mi-abante karon sa semifinal round human niya gipilde pinaagi sa puntos si John Zedric Borce sa host team Puerto Princesa Team A, 12-7. Ang pambato sa Mandaue mosuway pagsakmit og gold sa 30 kgs. sa iyang sangka batok sa boksidor gikan sa Baguio City.

Ang head coach sa Mandaue City nga si Peter Cuizon sa nabantog nga ALA Boxing Gym, nagkanayon nga daku ang iyang pagsalig nga molampos si Tarona sa sunod niyang sangka.

Sa pagka karon, segurado na ang Mandaue City nga makakuha og duha ka bronzes ug duha ka silvers kun mapilde man gani si Tarona sa gold medal round.

Si Stella pakyas pag-abante sa semis human siya gitaktak ni Robert Miguel Jalnaiz sa ilang sangka ubos sa 32 kgs. class. – BANAT NEWS