CEBU, Philippines - Gipalig-on ug maayo sa Power Forty ang ilang kampo pinaagi sa pagkuha kang kanhi UV Lancer Stevenson Dajalos kinsa mi-debut og 13 puntos aron tabangan ang iyang team sa pagkulit og 113-94 nga kadaogan batok sa Better Run Basketball Association (BRBA) sa pagbalik sa 1st Cebu Golden Basketball League (CGBL) kagahapon didto sa Inayawan Sports Complex.
Ang Power Forty mao na karo’y nag-una sa CGBL sa ilang 3-0 nga baraha.
Sa sayo pa, midaog ang Minglanilla Basketball Association (MIBA) pinaagi sa forfeiture tungod sa wala pagbutho sa ilang silingan nga Naga Above Forty Basketball Association (NAFBA). Kini maoy naghatod sa MIBA ngadto sa ilang ikaduhang daog sulod sa tulo ka duwa sa ilang 2-1 nga baraha apan ang Los Amigos Basketball Association (LABA) maoy nagsunod sa Power Forty sa ilang 2-0 nga baraha.
Wala madayon ang duwa tali sa LABA ug Power Forty sa miaging semana tungod sa Sinulog diin mag-ilog unta sila sa liderato ug gi-uswag kini ngadto sa Pebrero 13, ang kataposang duwa sa elimination round.
Si Gideon Bughao maoy nangu sa Power Forty human siya mohakot og 26 puntos ug gisundan siya ni Jingjing Gacayan kinsa mihakot ug 18 puntos. Sila si Gilbert Gajudo ug Atty. Flor Yosores mi-iskor og 16 ug 15 puntos matag usa alang sa Power Forty.
Ang Better Run kinsa naghupot na karon og 1-3 nga baraha gipangulohan ni Pacito Campos kinsa miposa ug 38 puntos samtang ang beteranong point guard nga si Dodong Espinosa midugang og 18 puntos.
Sa kasamtangan, bugtong ang Danao Ruby Star Basketball Association (DARUSBA) ang wala pa makatilaw og daog sa unom ka teams.
Puntos matag usa:
Power Forty (113)— Bughao 26, Gacayan 18, Gajudo 16, Yosores 15, Dajalos 13, Dela Rama 10, Vernaiz 9, Arias 4, Dejarme 2
Better Run (94)— Campos 38, Espinosa 18, Lopez 9, Mosqueda 8, Sestoso 8, Abadejos 6, Cabrera 5, Arias 2. - Gabby G. Malagar (BANAT NEWS)