CEBU, Philippines - Duha ka riders sa Team PLDT -- Bitoy Daa ug Dondi Azarcon ang nanghawod sa tagsa-tagsa nila ka dibisyon sa unang adlaw sa 8th RECYCLE-Luzvimin-USA Cebu Race Series kagahapon diha sa Mandaue City reclamation area.
Si Daa sa PLDT-Bohol maoy midominar sa criterium sa class B, samtang si Azarcon mao sab ang nanghawod sa class C sa maong lumba nga gitawag sab og "Tour Ni Frank."
Gitapos ni Daa ang lumba sud sa usa ka oras, 12 minutos ug 48.088 segundos aron makuha ang yellow jersey sa lumba paingon ngadto sa Toledo nga mosubay sa Transcentral highway ug tapuson sa Buak.
Misakmit sa ikaduhang luna mao si Bernie Mateo sa HSBC, samtang ang Sugbuanong si Frank Alindao mipahiluna sa ikatulong dapit.
Ang rider sa HBC nga si Ernie Hortaleza, kinsa maoy nagdala sa high-tech nga transponder dinhi sa Sugbu, mitungtong sa ikaupat nga dapit ug ang taga-Dipolog nga si Jef Flores maoy fifth placer.
Mokompleto sa top 10 finishers mao ang si RP Ironman Noy Jopson, Rommel Lindayog, Wilson Rosetesm Pinpin Uy ug ang Sugbuanong si Ome Rodriguez.
Sa iyang bahin, si Azarcon mitapos sa lumba sa oras nga 1:02.34, gisundan nila ni Allan Pastor sa Leyte ug Antonio Coden sa ikaduha ug ikatulo nga dapit.
Sila si Lito Pasedio, Tyre Lambo, Louie Gutierrez, Tata Ty, Xyle Regis, Alex Barras ug Bogart Dela Rosa mao ang mikompleto sa top 10. (BANATNEWS)