Mandaue andam na sa 2010 National Youth

CEBU, Philippines - Upat ka mga amateur prospects gikan sa ALA Boxing Gym ang morepresentar karon sa Mandaue City alang sa 2010 National Youth Amateur Boxing Championship karong Lunes didto sa Puerto Princesa sa Palawan.

Ang upat ka mga boksidor mao sila si Richard Rama (26 kgs), Rommel Tuñacao (28 kgs), Rheson Tarona (30 kgs) ug Jeffrey Stella (32 kgs) nga molarga karong adlawa paingon sa Palawan uban sa ilang coach nga si Peter Cuizon.

Si Cuizon mipadayag sa ilang kaandam nga makigsangka batok sa uban pang dekalibreng amateur boxers gikan sa nagkadaiyang bahin sa nasud sa tinuig nga torneyo nga gipasiugdahan sa Amateur Boxing Association of the Philippines (ABAP).

Masaligon si Cuizon nga mohakot og bulawang medalya tungod sa walay puas nila nga training ug sa pagsalmot sa nagkadaiyang torneyo dinhi sa Sugbu.

Hinuon, dili sama sa Mandaue City, ang Talisay City ug Cebu City pakyas pagpadala og mga boksidor alang sa maong torneyo.

Ang Team Cebu sa Cebu City Sports Center (CCSC) stable nga nangharos sa miaging 2009 National Youth Amateur Boxing Championship didto sa Bacolod City, dili makapakita og aksiyon karong tuiga tungod sa pagbiya sa pipila nila ka boksidor, kinsa nakahukom na nga mosulod sa professional boxing.   (BANATNEWS)