Fuentes mitumba ni Ancaya sa Summit Night Boxing Series

CEBU, Philippines - Nangayo lang og tulo ka round si ALA Boy Rocky Fuentes aron tumbahon ang nanulong si Pit Ancaya sa main event sa Summit Fight Night Boxing Series niadtong miaging gabii diha sa Gaisano Country Mall carpark sa Banilad, ning siyudad.

Grabeng kastigo ang gipahamtang ni reigning Philippine flyweight champion nga si Fuentes ngadto ni Ancaya, kinsa nalup-og sa nahabiling 39 segundos sa ikatulong round.

Sa laing bahin, wala usab molungtad og dugay ang kontra ni superflyweight prospect Marjun Yap nga si Julius Alcopra.

Gipahagsa ni Yap ang taga-Manila nga si Alcopra pinaagi sa iyang mahait nga jab uban ang makusog nga birada sa lawas ug ulo sa 1:36 sa round 5.

Sa undercard, midaog pinaagi sa majority decision ang mga pambato sa Rex Wakee Salud (RWS) stable nga sila si Fernando Ocon ug Dave Baliguat batok sa tagsa-tagsa nilang kaatbang.

Ang flyweight nga si Ocon mipukan ni Marjohn Macahilig sa Kalibo,Aklan, samtang ang super flyweight prospect nga si Baliguat mipilde ni Milchar Valiente sa Lanao del Norte sa ilang six rounder bouts.

Ang garbo sa Butuan City nga si Jesson Taroja mikulata usab ni John Paul Colon sa Mandaue City.

Ang mga pambato sa Bohol nga sila si Paul Sasan, Roel Peligro ug Gerald Ranque pakyas sa ilang kampanya dihang gikulata sila sa ilang tagsa-tagsa ka kaatbang.

Si Sasan, lumad nga taga-Dagohoy, Bohol, napilde ngadto ni Zalde Aroa sa Bantayan Island pinaagi sa unanimous decision, si Peligro napilde pinaagi sa majority decision batok ni Kotsky Ebala sa Cagayan de Oro, samtang si Ranque napukan sab batok sa Sugbuanong si Joel Gestopa pinaagi sa majority decision sa ilang sangka sa superflyweight division.   (BANATNEWS)