Philippine Navy, Banilad Academy nangharos

CEBU, Philippines - Mihipos og daog ang mga eskrimador gikan sa Philippine Navy ug Banilad Academy sa 5th Sinulog Eskrima Tournament niadtong Sabado diha sa Academy of Eskrima Mountain Training Park sa Brgy. Busay, ning siyudad.

Ang mga sakop sa Philippine Navy maoy naghari sa walo ka kategoriya, samtang ang mga pambato sa Banilad Academy midominar sa pito ka kategoriya.

Sa ilang kadaugan, ang Philippine Navy ug Banilad Academy nakaangkon og katungod aron mo-representar sa Pilipinas alang sa 10th World Eskrima Kali Arnis Federation (WEKAF) Championships didto sa Mexico City.

Mitunol og daog alang sa Philippine Navy mao sila si Fernando Parcon, Juan Furiscal Jr., Peter Dahan, Jessie Candado, Jane Briones ug Roldan Ramirez.

Sila si Miguel Mendoza, David Arwell Camus, Steven Atenta, Raphael Quijano ug Kyle Clifford Apa-ap mao sab ang mihatag og daog alang sa Banilad Academy.

Mikompleto sa mga mananaog mao sila si Caming Ralph Tuñacao, Edie Boy Amar sa Busay Warriors ug Joseph James Roiles sa Pari-an Aryan Arnis.

Si Tuñacao mipukan ni Denstile Ibarita sa Mabolo Eskrima Team, si Amar mimakmak ni Bobby Catana sa Mabolo Arnis Group, samtang si Roiles mipaundang ni Roldan Ramirez sa cruiserweight class.   (BANATNEWS)