Delarmino mi-TKO ni Oraiz sa "Cage of Vengeance 2010"

CEBU, Philippines - Pakyas sa tinguha niyang panimalus ang Sugbuanong si Rodel "Kid" Oraiz dihang gitiwasan siya sa mortal niyang karibal nga si Leonard Delarmino sa ikaduha nilang panag-abot sa main event sa Cage of Vengeance 2010 kagabii didto sa Mango Square Mall sa Gen.Maxilom Avenue.

Sama sa resulta sa una nilang sangka niadtong Disyembre, 2009, usa gihapon ka naghagurus nga knee kick ang gipatama sa taga-Ilo-ilo nga si Delarmino aron patumbahon si Oraiz sa nahibiling 3:02 sa first round.

Hinuon, dili usab kini sayun nga kadaugan alang ni Delarmino tungod kay naputos usab sa bun-og ug gisi ang iyang nawong gikan sa mga tira ni Oraiz.

Sa supporting bout, gipatug ni Agustin Delarmino ang taga-Lapu-lapu nga si Erik Areglado sa second round, samtang si Rogelito Plomeda mipitol usab sa batan-ong si Junjier Torbiso.

Si Plomeda mipauwan og mga kinumo ngadto ni Torbiso sa second round kinsa napugos pag-undang tungod sa grabeng kastigo nga iyang nahiaguman.

Gipatumba usab ni Rex Delara si Jojie Lumbo sa Naga City sa unang round. Si Albert Sumido mipahunong ni Ernie Braca pinaagi sa usa ka rear naked choke sa naghinapos nga uno minuto ug 45 segundos sa second round.

Si Romelo Estra maoy mipatigbabaw sa ilang sangka ni Victor Catubig sa CMAC Mandaue pinaagi sa puntos, samtang si Dennis Salazar midominar batok ni Alex Goc-ong pinaagi sa unanimous decision ug si Junmar "Naruto" Macaraya mipukan ni Kyle Co.

Si Jessie Abdaba mipaundang ni Greg Rufino, samtang si Nilrax De Café midabo-dabo ni Judy Arsenal ug sila si Adam Torbiso ug Rodel Calbog mipaundang nila ni Vincent Faborada ug Ritchie Colina.

Ang maong MMA event gipasiugdahan sa Fearless Fighting Championships (FFC) ug Extreme Combat Sports (ECS).  - Lemuel P. Maglinte (BANAT NEWS)