Tulo ka Boholanong boksidor moaway karon

CEBU, Philippines - Tulo ka boksidor gikan sa Bohol ang mopakita'g aksiyon sa "Summit Fight Night Boxing Tour" karong gabii diha sa Gaisano Countrymall carpark sa Brgy. Banilad, ning siyudad.

Ang mga pambato sa Jimdomar Boxing Stable ni Edgar Ricafort nga sila si Gerald Ranque, Roel Peligro ug Paul Sasan mopakita karon sa ilang abilidad batok sa tagsa-tagsa nila ka kaatbang sa unom ka hugna nga binakbakay.

Plano karon ni Ranque sa Dagohoy, Bohol nga mokulit sa ikaduha niyang daog batok sa Sugbuanong si Joel Gestopa sa 124 lbs. division.

Sa iyang bahin, ang knockout artist nga si Peligro moladlad sab sa iyang abilidad batok ni Kotski Ebala sa Cagayan de Oro City, samtang si Sasan maninguhang modaog sa iyang debut fight batok ni   Jesson Aroa sa Bantayan.

Sa main event, si Philippine flyweight champion Rocky Fuentes makigsinukliay og kumo batok ni Pit Andaya sa Manila sa ilang ten-round showdown, samtang si superflyweight prospect Marjun Yap makigsinukliay sab og kumo batok ni Julius Agcopra sa co-main event.

Mokompleto sa undercard, mao si bantamweight prospect Jesson Tarona sa Butuan City batok ni John Paul Colon, Marjohn Macahilig batok ni Fernando Ocon sa Rex Wakee Salud (RWS) stable ug Milchar Valiente batok Dave Baliguat.

Ang boxing event nga gihalad alang sa kasaulogan sa kapistahan sa Balaang Bata Senyor Santo Niño, namugna sa hiniusang puwersa sa Summit Natural Drinking Water ug sa ALA Promotions uban sa abag sa Games and Amusement Board (GAB).   (BANATNEWS)