Woodfin mipatug ni jabbari sa URCC 5
CEBU, Philippines - Wala molungtad og dugay ug daling naangkon ni Tom 'The Hawk' Woodfin ang kadaugan dihang iyang gipaundang sa unang hugna si Razi Jabbari sa Colt 45-Universal Reality Combat Championship (URCC) 5: Deliverance niadtong Sabado sa gabii diha sa Cebu International Convention Center (CICC) sa dakbayan sa Mandaue.
Si Woodfin, kinsa nag-ensayo ubos sa Team Deftac ug Yaw-Yan Cebu Ardigma mihimo'g usa ka makabungog nga patid ngadto sa apapangig ni Jabbari, kinsa natumba sa 6:36 sa opening round. Si Jabbari nawad-an og panimuot sud sa pipila ka minutos sa wala pa mauli-i uban sa abag sa oxygen tank.
Ang 24-anyos nga si Woodfin nagkanayon nga bugtong pabor nga gikuptan ni Jabbari sa ilang away mao ang gidak-on, apan gitino sa niya nga mas nakaangkon siya og dakung labaw sa kusog.
Sa supporting bouts, milampos ang Sugbuanong si Maxlito “Hyper” Yong pagdepensa sa iyang URCC Visayas flyweight belt pinaagi sa second round TKO batok ni Remus Belguerra.
Sukwahi ni Yong, pakyas si Demtrio 'The Standard' de la Torre pagpanalipod sa iyang pin weight title dihang gipaundang siya ni Victor 'The Gladiator' Torre sa 1:22 sa second round.
Midaog sab si Mark 'Buhawe' Revalde batok ni Sloy 'Black Smith' Analito pinaagi sa unanimous decision, samtang si Jerlyn 'Matador' Liera mipahunong ni Argie Junsay sa second round ug si Geronimo 'Matador' Etac mimakmak ni Wilfredo 'Tiger Force' Cajurao sa first round.
Lain pang mikulit og daog sa MMA event mao sila si Jimmy 'The Silencer' Yabo, Jecar 'The Alligator' Tumulak ug Arie Zarco. (BANATNEWS)
- Latest
- Trending
