CEBU, Philippines - Napulo ka teams gawas Sugbu ang nipadayag sa ilang partisipasyon sa 5th Sinulog Eskrima Tournament karong adlawa diha sa Doce Pares Mountain Training Park sa barangay Busay, ning siyudad.
Kini mao ang Zamboanga del Norte, Metro Manila ug Luzon teams nga naglakip sa Baguio City, Philippine Navy, Philippine Army ug Philippine Air Force.
Si Zamboanga del Norte Provincial Board Member Frederick Jalosjos maoy mangulo sa Dapitan Arnis Team nga gilaumang mopakita'g maayong labok batok sa pambato sa Sugbu alang sa overall championship.
Si Jalosjos, kinsa ulipon sab sa nagkalain-laing matang sa martial arts, makigtigi sab alang sa luna sa Philippine Team nga mopakita'g aksiyon sa 10th World Eskrima Kali Arnis Championships didto sa Mexico City.
Lain pang out-of-town teams naglakip sa General Santos City nga pangulohan ni Technical Sergeant Silvano Bombales, Tacurong Arnis Team, Dumaguete City Arnis Team ug Davao City Eskrima Team.
Naglangkob sa local teams mao ang koponan gikan sa Talamban, Lapu-Lapu, Mabolo, Mandaue, Mambaling, Inayawan,
Parian, Labangon, San Fernando ug Banilad nga manalipod sa ilang teritoryo batok sa mga bisitang koponan.
Ang 5th Sinulog Eskrima Tournament maoy katapusang hugna sa qualifying events alang sa 10th World Championships. – BANAT NEWS