Ado/Crispin milangkat korona sa BSBA caging

CEBU, Philippines - Nakalingkawas sa makutas nga duwa ang Ado/Crispin pinaagi sa pagtumba sa Mat-Fel, 63-54 aron langkaton ang korona sa Buaya Senior Basketball Association (BSBA) Lauro's Cup basketball tournament dili pa dugay didto sa Buaya basketball gym sa dakbayan sa Lapu-Lapu.

Ang Ado/Crispin ug Mat-Fel parehong mipatuman sa ilang hugot nga depensa uban ang mainitong opensa nga miresulta sa ilang panagtabla, 13-all paghuman sa unang 10 minutos sa duwa.

Wala kahubsi og kusog ang duha ka kampo sa second quarter ug padayong nagsinukliay og mga puntos, apan ang Ado/Crispin maoy miangkon og pabor diin miposte kini'g tres puntos nga bentaha, 26-23 sa halftime.

Gikan sa tres puntos nga labaw, ang Ado/Crispin ni team owners Ado Tampus ug Crispin Casio, hinay-hinay nga mi-inat sa ilang labaw ngadto sa sayes puntos, 43-37 sa wala pa nila kulita ang nuybe puntos nga kadaugan.

Si Ely Andren mipupo og 17 puntos ug si Bal Nabua miani og 10 puntos aron pangulohan ang Ado/Crispin, samtang ang pilderong Mat-Fel nilang team owners Mat Casio ug Felix Casio gipangulohan sab ni Pompie Ngujo pinaagi sa iyang 10 puntos.

Sa laing bahin, ang Super Ian nakalingkawas sab sa ilang kulbahinam nga duwa batok sa Nene/Ricky sa iskor nga 69-63 aron angkonon ang ikatulong puwesto ning maong liga nga gipaluyohan sab ni Buaya Brgy. Capt. Lauro Soroño uban sa iyang konsehales -- Nene Buico, Mat Casio, Felix Casio, Ado Tampus, Crispin Casio ug Ricky Abing ug ingon man sa Jim Sportswear.

Puntos Matag Usa

Unang duwa:

SUPER IAN (69) - Enriquez 14, Lomonggo 13, Inot 10, Inot 10, Decembrano 8, Egarma 7, Labadan 4, Ceniza 4, Igot 2

NENE/RICKY (63) - Casio 16, Gogo 11, Pepito 8, Micabalo 7, Guido 6, Soroño L. 5, Soroño P. 2, Pejana 2, Buico 2

Ikaduhang duwa:

ADO/CRISPIN (63) - Andren 17, Nabua 10, Carillas 7, Potot 6, Borbajo 6, Pino 4, Linao 3, Inot 2, Booc 2, Inot 2

MAT-FEL (54) - Ngujo 10, Casio M. 9, Caputi 8, Cidra 5, Ugsang 5, Mingoy 4, Nabua 4, Capuyan 4, Casio 2, Baricuatro 2, Casio 2. – BANAT NEWS