Evans bayani na sab sa Kings

CEBU, Philippines - Sa laing higayon, nahimo na sab nga bayani ang rookie point guard sa Sacramento Kings nga si Tyreke Evans kinsa mihimo na sab og milagro dihang nakapasulod siya sa iyang jumpshot sa kataposang 0.7 segundo aron hatagan ang Kings og kulba-hinam nga 102-100 nga kadaogan batok sa Denver Nuggets kagahapon sa nagpadayong duwa sa National Basketball Association (NBA) didto sa Arco Arena sa Sacramento, California. Sukwahi sa ilang sikit kaayong duwa batok sa ilang silingan nga Los Angeles ug Cleveland Cavaliers diin pakyas si Evans pagpasulod sa iya untang game-winning shots, misaler na sab ang iyang abilidad kagahapon aron hatagan ang Kings sa ilang ika-15 nga daog uban ang 21 ka pilde.

Si Evans maoy nangu sa Kings sa iyang 27 puntos ug gikan sa bench, mitampo og 17 puntos si Spencer Hawes ug si Omri Casspi midugang og 16 puntos.

Ang Nuggets kinsa nagduwa nga wala gihapon si Carmelo Anthony, gipangulohan ni Chauncey Billups kinsa mibahug sab og 27 puntos ug si Kenyon Martin midugang og 20 puntos uban sa 10 ka rebounds. Tungod sa maong kapildehan, ang Nuggets aduna nay 23-14 nga baraha.

Sa laing bahin, nasumpo sa Charlotte Bobcats ang Memphis Grizzlies nga bag-o lang nakabiktima og mga mas lig-on nga teams pinaagi sa pag-iskor og sikit sab nga 89-87 nga kadaogan pinaagi sa tirada ni Gerald Walace atol sa paghuni sa buzzer human mosipyat ang iyang kauban nga si Raymond Felton.

Si Wallace natumba human sa iyang tirada ug gidumog dayon sa iyang mga teammates nga mihangop kaniya tungod sa kalipay samtang wala makalihok ang Grizzlies daw giugbok nga kandila.

Sila si Felton ug Wallace maoy nangu sa Bobcats sa ilang 19 ug 18 puntos matag usa samtang si OJ Mayo maoy nangu sa Grizzlies sa iyang 25 puntos.

Sa laing duwa palibot sa NBA, gilubong sa Orlando ang Atlanta, 113-81, midaog ang Philadelphia batok sa Detroit, 104-94, naka-ipsot ang Oklahoma City batok sa Indiana, 108-102, midaog ang Chicago batok sa Minnesota, 110-96, gipakaging sa Utah ang Dallas, 111-93 ug midaog ang Houston batok New York, 105-96. - GGM gikan sa NBA.com