JKT, Jonadel's mag-abot sa finals sa Norvic Abella Cup

 CEBU, Philippines - Ang JKT Five ug ang Jonadel's maoy magsangka sa kampiyonato human gipilde ang tagsa-tagsa nila ka kaatbang sa pagpadayon sa Norvic Abella Cup basketball tournament niadtong Martes diha sa Labangon covered court.

Unang miambak sa finals ang JKT Five pinaagi sa paglubong sa DHAGZ sa iskor nga 106-83, samtang ang Jonadel's mipalagpot sa RCAF sa iskor nga 93-84.

Ang final duwaon karong gabii, samtang ang mga pilderong DHAGZ ug RCAF maoy magtigi alang sa ikatulong dapit.

Ang DHAGZ unang miposte og labaw, 27-19, apan ang JKT mibawos pinaagi sa ilang 46-12 nga rally sa ikaduhang kuwarter aron ilogon ang labaw.

Sila si Opong Zafra ug Jojo Bagares maoy nangulo sa JKT pinaagi sa ilang 20 ug 19 puntos, samtang si Elmer Alibawan miburak og 29 puntos aron pangulohan ang DHAGZ ug si Dicksim Kintanar miamot og 17 puntos.

Si William Caster mibahog og 31 puntos alang sa Jonadel’s, samtang sila si Roy Lansang ug Tining Ceros parehong mipuntos og 16 matag usa.

Ang team owner sa RCAF nga si Romeo Faunillan ug Jong Wilbur pareho sab mi-iskor og 17 puntos alang sa ilang team.

Unang duwa:

JKT (106) - Zafra 20, Bagares 19, Aguilon 13, Deldig 6, Cabasan 5, Geyrozaga 5, Abella 4, Cajes 4, Lobada 4, Caguindangan 4, Vernal 4, Tabasa 4

DHAGZ (83) - Alibawana 29, Kintanar 17, Donggon 13, Jabonero 12, Villanueva 4, D. Restauro 2, Pilares 2, E. Restauro 2, Daclan 2,

Ikaduhang duwa:

Jonadel’s (93) - Caster 31, Lansang 16, Ceros 16, Cortes 11, B. Abella 8, Ponteras 5, Treyes 4, R. Abella 2

RCAF (84) - Faunillan 17, Wilbur 17, A. Tabasa 16, Tapere 12, Sabanal 9, Sarucam 4, W. Martinez 3, Rusiana 2, Dacuyan 2, Ortega 2, Ebrada 2. - Gabby G. Malagar (BANAT NEWS)