Gonzales-Colina tandem naghari

CEBU, Philippines - Milampos ang tandem nilang Teresito Gonzales ug Reyden Colina pagsakmit sa titulo sa classified doubles sa 1st Osmeña-Rama Barangayan Dartfest niadtong miaging adlaw diha sa Baseline Restaurant and Recreation Center.

Ang Gonzales-Colina tandem mipukan sa parisan nilang Alvin Villa ug Jonathan Rubi, kinsa nahimutang sa ikaduha nga dapit, samtang ang mi-okupar sa ikatulo nga dapit mao ang tandem nilang Alan Veloso ug Roger Dequit.

Sa maong kadaugan sila si Gonzales ug Colina gipaabot nga modawat og P4,000 nga ganting salapi atol unya sa awarding ceremony karong Sabado diha gihapon sa Baseline Restaurant nga tambungan ni Cebu City councilor Sylvan 'Jack' Jakosalem.

Ang mga runners-up tunolan sab og ganting salapi.

Sa pikas bahin,  sila si Juhnryl Cañete ug Christopher Daclan mao sab ang gikoronahan isip hari sa Open Youth Doubles human gipukan ang tandem nilang Renald Barrido ug Arnel Baltonado, samtang ang tandem nilang Christopher Salazar ug Ervin Amaba maoy miangkon sa ikatulo nga dapit.

Sa 4-man team category, ang Team 11 ni team captain Jourgen Villamor, Warren Mepisa, Winnie Ocanada ug Adrian Delos Reyes mao ang misakmit sa kampiyonato.

Ang maong torneyo gipasiugdahan sa kagamhanan sa siyudad sa Sugbu ug sa Cebu City Hall Employee Darters Association (CHEDA) ubos sa liderato ni commissioner   Bert Colong Jr.   (BANATNEWS)