BIR nakadaog na gyud sa USC PTCA tilt

CEBU, Philippines - Nakatilaw na gyud og daog sud sa tulo ka duwa ang Bureau of Internal Revenue (BIR) sa giya ni Yoli Meso human nila gipukan ang USC-Green team, 82-71 sa nagpadayong USC South Campus PTCA, Inc. basketball tournament niadtong Domingo diha sa South Campus covered sa dalan J. Alcantara, ning siyudad.

Gikan sa ilang 20-14 nga labaw, kalit lang nagmangtas ang BIR ug nakamaneho kini pag-abante og 14 puntos sa iskor nga 43-29. Padayong nagdilaab ang kainit sa BIR sa second half aron palawman pa ang labaw ngadto sa 22 points, 70-48 sa fourth period pinaagi sa pagtambayayong nilang Leo Galvez, Jimwell Legarde, Jun Santiago ug ex-SWU Cobra Jessie Lumantas.

 Sila si Lumantas ug Santiago parehong miburak og 11 puntos alang sa BIR, samtang sila si Christopher Diamos, Clint del Rosario, Jason Rodriguez ug Meso pareho sab nga mi-iskor og 10 puntos.

Si Dante Quijano maoy nangulo sa USC-Green nga mipabuto og 22 puntos, gisundan ni Glen Soco nga adunay 14 puntos. 

PUNTOS MATAG USA

BIR (82) - Lumantas 11, Santiago 11, Diamos 10, Del Rosario 10, Rodriguez 10, Meso 10, Legarde 6, Galvez 6, Aluro 4, California 3, Victor 2

USC-Green (71) - Quijano 22, Soco 14, Gutierrez 10, Rivera 10, Cala 6, Galan 6, Casas 2, Gappe 1    (BANATNEWS)