Losiaboi midaog na sab og laing titulo

CEBU, Philippines - Walay plano ang Kenyan Runner nga si Simon Losiaboi nga buhian ang titulo isip bag-ong hari sa marathon dinhi sa Sugbu human niya gidominar ang Sesqui Blue Run niadtong Domingo diha sa Cebu Business Park.

Human sa nagmalampuson niyang kampanya sa “Halad Kang Mano Amon” Run niadtong Disyembre 24 didto sa Danao, nag-una na usab ang 27-anyos nga missionary sa 16K men’s class.

Nagsunod ni Losiaboi mao sila si John Phillip Dueñas sa ikaduhang dapit ug Mendel Lopez alang sa ikatulong luna.

Sama ni Losiaboi, nagsunod-sunod usab ang kadaugan sa Sugbuanang si Madelyn Carter, kinsa mao ang giilang reyna sa women’s class uban nila ni Liezl Lumindas-Getaruelas ug Lrhiz Echavez alang sa ikaduha ug ikatulong dapit.

Sila si Losiaboi ug Carter nakadawat og P5,000 nga ganting salapi matag usa, samtang ang second ug third placers mibulsa og P3,000 ug P2,000 matag usa.

Sa 5K division, ang pambato sa Second Bridge Running Club nga si Roland Montebon ug Carolino Jobert mao ang nanghari sa mixed division, samtang mipahiluna sa ikatulong dapit mao ang produkto sa University of Mindanao nga si Robert Daang.

Sila si Kresha Mae Ygot ug James Noval mao ang midaog sa 3K women’s ug men’s open.

Ang salapi nga natigom sa maong lumba gawion sa Ateneo Graduate School of Business (AGSB) isip pundo sa umaabot nilang outreach programs.   (BANATNEWS)