Ado/Crispin naka-eskapo, Mat-Fel, Super Ian daog sab sa BSBA cagefest

CEBU, Philippines - Naka-eskapo ang Ado/Crispin squad bitbit ang 63-62 nga kadaugan batok sa Saymer sa Buaya Senior Basketball Association (BSBA) Christmas League 2009 didto sa dakbayan sa Lapu-Lapu.

Hinugtanay sa bakus ang gipakitang labok sa duha ka kampo pagsugod sa duwa diin ang ADO/CRISPIN milansang og kuwatro puntos nga labaw paghuman sa first period, 15-11. Apan ang Saymer ubos sa liderato ni Godinez, nakigsinukliay og puntos hangtod nga ilang napatabla ang iskor sa halftime, 28-all.

Nahimong kulbahinam ang duwa pagsugod sa katapusang duha ka kuwarter hangtod nga ang ADO/CRISPIN sa giya nilang Elly Andren ug Dindo dela Rama mipahimulos sa ilang kasinatian aron makuha ang makutas nga kadaugan.

Si Andren mitimbre og 18 puntos, samtang si dela Rama mitimang og 11 puntos aron pangulohan ang ADO/CRISPIN. Ang pilderong Saymer gipangulohan sab ni Godinez, kinsa mipabuto og 22 puntos, gisundan ni Lara nga miluthang og 16 puntos.

Sa laing aksiyon, mikulit sab og daog ang Mat-Fel ug Super Ian human gilampurnas ang tagsa-tagsa nila ka kaatbang.

Ang Mat-Fel mipukan sa 3M-RJ sa iskor nga 67-59, samtang ang Super Ian mipahamtang og 12 puntos nga kapildihan ngadto sa Ricky/Nene sa iskor nga 59-47.

Si Pompe Ngujo maoy topscorer sa Mat-Fel pinaagi sa iyang 16 puntos. Ang naparot nga 3M-RJ gipangulohan sab ni Catag-catag sa iyang 15 puntos.

Ang maong liga gipaluyohan ni Brgy. Capt. Lauro Soroño uban nila ni barangay councilors Mat Casio ug Felix Casio ug sa Jim Sportswear. BANAT NEWS