Jopson, Echavez nanghawod sa 3-15-3 Triathlon

CEBU, Philippines - Ang RP Iron Man champion nga si Noynoy Jopson maoy gikoronahan isip hari sa premiere men's open sa final leg sa 3-15-3 Triathlon niadtong Domingo didto sa Plantation Bay Resort and Spa sa Mactan Island.

Nahimutang si Jopson sa ikatulong dapit sa 300m swimming, apan ang Sugbuanon nakabawi sa 15km. bike ug sa 3K run aron masakmit ang korona.

Si Jopson mitapos sa makutas nga lumba sud sa 45 minutos ug 49 segundos, gisundan nila ni Arches (48:37) ug Baguio (49:40) nga miangkon sa ikaduha ug ikatulo nga dapit.

Sa women’s open, si Lhoriz Echavez maoy giila nga labing paspas human niya gitapos ang lumba sa oras nga 59:12.00.

Si Janice Bautista nga mi-oras og dos minutos ug tres segundos, samtang si Cleolett Ty mipuwesto sa ikatulong dapit sa oras nga 1:08.08.

Sa juniors division, si Vince Mahinay maoy migawas nga kampiyon dihang iyang gitapos ang lumba sa oras nga 1:04:13 uban ni Mark Almosera kinsa miangkon sa ikaduhang luna sa oras nga 1:08:08.

Mikompleto sa lista sa mga mananaug sa lumba nga gipasiugdahan sa Sugbu Triathlon ug Danao City Sports Commission (DCSC) mao sila si Victor Villamor (masters division), Frederick Pahanonot (seniors 20), Lyndol Dongallo (seniors 30), Rico Valention (mountain bike class) ug Team Leona sa tandem category. (BANAT NEWS)