Ortega bida sa AC Sports sa USC-PTCA tilt

CEBU, Philippines - Wala kapugngi ang paghuramentado ni Cesar Esteban Ortega aron pangulohan ang AC Sports pagpukan sa Bureau of Internal Revenue (BIR), 79-63 sa tinuig nga USC-South Campus PTCA Inc. basketball tournament diha sa South Campus covered court sa dalan J. Alcantara, ning dakbayan.

Gawas sa iyang 21 puntos, si Ortega wala sab kapugngi sa rebounding department nga daku og natabang sa AC Sports pagposte og 2-0 nga baraha.

Ang BIR nilabaw og sayes, 23-17, apan kalit lang nga nanginit ang AC Sports luyo sa paningkamot ni point guard Lou Regidor ug Archie Baba aron ilogon ang labaw sa halftime, 36-34. Ang AC Sports nga walay katagbawan, daling miinat sa ilang bentaha ngadto sa 10 puntos, 56-46 sa third period.

Laing mi-abag ni Ortega sa opensa mao si Christian Blanco kinsa miamot og 17 puntos.

Si Jun Santiago maoy nangulo sa BIR pinaagi sa iyang 14 puntos, samtang sila si Jimwell Legarde, Chris Diamos ug Yoli Meso mi-iskor sab og 10 puntos matag usa. (BANAT NEWS)