UTASSCO kampiyon gihapon sa X'mas League

CEBU, Philippines - Milampos ang UTASSCO Utility sa pagdepensa sa ilang korona sa Power Forty Christmas League basketball tournament human ilang gilatigo ang Park ‘N Go Bakeshop sa iskor, 100-80 kaniadtong Sabado sa gabii didto sa Inayawan Sports Complex.

Ang UTASSCo nga gipangulohan ni team owner Atty. Flor Yosores, mitapos sa ilang best-of-three series sa iskor, 2-1 human sila mapilde sa Game 2 sa miaging semana.

Sa sayo pa, midaog ang Water Market batok sa Avew Maria Sanctuary Park sa iskor, 113-108 sa usa ka exhibition game.

Si Atty. Yosores sab ang nangu sa opensa sa UTASSCO human siya morehistro og 18 puntos ug sila maoy mibulsa sa unang ganti nga lima ka libo ka pesos cash. Mitali sab og 18 puntos si Wilbur Cabrera samtang sila si Alex Mercado ug Joey Escalon midugang og 16 ug 13 puntos matag usa kanila.

Ang Park 'N Go gipangulohan sa ilang team owner nga si Romy Rama kinsa mibahug og 22 puntos samtang si Michael Arias miamot og 18 puntos. Sila sab maoy nakadawat sa tres mil pesos nga ganting cash samtang ang Water Market nakadawat og dos mil pesos sa ilang pagsakmit sa ikatulong pwesto.

Si Vez Eleguin miburak og 30 puntos aron pangulohan ang Water Market samtang sila si Power Forty commissioner Edwin Dejacto ug Allan dela Rama miposa og 26 ug 25 puntos.

Ang Ave Maria gipangulohan ni Tony Navares kinsa mihakot og 24 puntos.

Ang nagpaluyo sa Power Forty Christmas League mao sila si Atty. Yosores, Romy ug Raul Rama, Vez Eleguin, Konsehal Jojo Ibones sa Cogon, Pardo, Nelly Cabase ug Tony Navares.

Puntos matag usa:

Unang Duwa:

Water Market (113)— Eleguin 30, Dejacto 26, Dela Rama 25, Yosores 10, Dacalos 8, Ramil 8, Cayacap 6

Ave Maria (108)— Navares 24, Fuentes 19, Traya 17, Mosqueda 15, Labajo 10, Romarez 9, Cabatas 8, Kalinga 6

Ikaduhang Duwa:

UTASSCO (100)— Yosores 28, Cabrera 18, Mercado 16, Escalon 13, Batac 9, Nacional 8, Labajo 8, Pestano 5, Yu 5

Park ‘N Go (80)—R. Rama 22, Arias 18, Ozon 9, Layon 9, Dejarme 6, Echavez 6, Lalican 6, Atillo 2, Dimitiman 2. - Gabby G. Malagar (BANAT NEWS)