Kaging sa lay-up

CEBU, Philippines - Nagsiyagit sa kalipay ang top rookie nga si Tyreke Evans sa Sacramento Kings dihang iyang napasulod ang iyang reverse lay-up sa kataposang 0.9 segundo aron mokaging ang host Milwaukee Bucks nga gipangulohan sa no. 2 rookie nga si Brandon Jennings sa iskor, 96-95 kagahapon atol sa nagpadayong 2009-2010 season sa National Basketball Association (NBA) didto sa Milwaukee, Wisconsin.

Susama sab ang nahitabo sa laing duwa didto sa San Antonio, Texas dihang midaog ang Spurs naka-ipsot sab batok sa nanulong nga Indiana Pacers sa iskor, 100-99 diin nakapasulod si Tim Duncan ug follow-up dunk may 4.6 segundos ang nahibiling oras aron baswaton ang Spurs kinsa naghupot na karon og 14-10 nga baraha.

Gilutsan ni Evan ang mas beteranong sentro sa Bucks nga si Andrew Bogut human siya modawat sa inbound. Ang Bucks mao na untay modaog human sa basket ni Ersan Ilyasova gikan sa assists ni Jennings aron paglabaw, 95-94 may singko segundos na lang ang oras.

Si Evans maoy nangu sa Kings sa iyang 24 puntos ug si Jason Thompson may 22 puntos ug 10 ka rebounds samtang si Carlos Delfino mi-iskor og 17 puntos alang sa Bucks ug si Jenning igo lang miamot og 15 puntos.

Sa laing bahin, ang kadaogan sa Spurs naghatag kang coach Gregg Popovich sa iyang ika-700 nga daog sa iyang career aron mahimong ika-16 nga NBA coach nga naka-abot sa maong record ug pito lang kanila maoy aktibong coach sa kasamtangan.

Si Duncan kinsa natapalan ni Roy Hibbert sa una niyang pagsuway og hansak, gisiyagitan sa mga fans ug yano ra usab kaayong naka-rekober ug milambos pag-usab sa bola aron padag-on ang Spurs. Mipuntos si Duncan og 19 uban sa iyang 16 ka rebounds.

Sila si Troy Murphy ug Hibbert maoy nangu sa Bucks sa ilang 21 ug 20 puntos matag usa.

Sa laing bahin, gipakuratan sa Los Angeles Clippers ang Philadelphia Sixers, 112-107 sa overtime human lang ang Sixers mi-iksor og upset kagahapon batok sa Boston Celtics.

Midaog sab sa overtime ang Chicago Bulls batok sa Atlanta Hawks, 101-98.

Sa laing resulta sa NBA, midaog ang Utah batok sa Charlotte, 110-102, mi-rally ang Orlando aron pagpukan sa Portland, 92-83, gilumsan sa Los Angeles Lakers ang New Jersey Nets, 103-84, mi-iskor sab ug come-from behind nga kadaogan ang Houston Rockets batok sa Oklahoma, 95-90 ug gihislotan sa Phoenix Suns ang Washington Wizards, 121-95. - Gabby G. Malagar gikan sa NBA.com (BANAT NEWS)