5th GUV Cup finals gitakda karon
CEBU, Philippines - Daku'g purohan maangkon sa defending women's champion Catmon ang sunod-sunod nilang korona human gipilde ang Sta. Fe sud sa tulo ka sets aron pag-abante ngadto sa municipal cluster finals sa 5th Governor Gwen Garcia Unity Volleyball (GUV) Cup kagahapon diha sa Cebu International Convention Center (CICC) Summit Hall.
Ang gamhanang Catmon mipilde sa Sta. Fe sa first set, 25-18 ug nakontrolar nila ang momentum aron pagposte og 25-16 ug 29-27 nga kadaugan sa sunod nga duha ka sets aron palayason ang ilang kaatbang.
Sa maong kadaugan, ang Catmon moduwa alang sa titulo batok sa Minglanilla, kinsa miabante sab sa final human gipalagpot ang inilog nga Liloan sa tulo ka sets, 25-16, 25-19, 25-19.
Sa men's division, ang Liloan spikers nakasud sa finals human gipilde ang Compostela, 25-17, 25-16, 25-22.
Ang Liloan moaway alang sa kampiyonato batok sa Minglanilla nga mibuntog sa Moalboal, 25-12, 25-13, 25-11 luyo sa mapintas nga atake nilang Lemuel Dave Arreza, Kareem Datig ug Ariz June Getuaban.
Sa city cluster, ang Mandaue belles nakaangkon sab og luna sa finals sa women's division human midaog pinaagi sa default batok sa Carcar. Ang Mandaue gilaumang magpas-an og kalbaryo sa ilang pakigsangka batok sa Talisay alang sa korona. Ang Talisay miabante sa kampiyonato human gipilde ang Danao, 25-11, 25-11, 25-11.
Sa men's bracket, ang Talisay ug Mandaue maoy mag-ilog sa titulo. Ang Talisay nidaog pinaagi sa default batok sa Carcar, samtang ang Mandaue mipalagpot sa Toledo, 25-21, 25-19, 25-21.
Ang championship games himuon karong adlawa sugod sa alas-8:30 sa buntag diha gihapon sa CICC. (BANATNEWS)
- Latest
- Trending
