CEBU, Philippines - Kasamtangang nag-una ang Los Amigos Basketball Association (LABA)-Banilad, Mandaue City human ilang gilubong ang Naga Above Forty Basketball Association (NAFBA), 95-74 sa nagpadayong Cebu Golden Basketball League (CGBL) diha sa Inayawan Sports Complex.
Ang LABA-Banilad nagbitbit na karon og 2-0 nga baraha.
Sa laing duwa, ang Minglanilla Basketball Association (MIBA) mikulit sab og daog pinaagi sa paglubong sa Better Run Basketball Association (BRBA) sa iskor nga 105-77.
Walay bisan usa gikan sa NAFBA nga nakasikop sa kanhi ex-USJR Jaguars point guard Pablo Yu, kinsa misakiyo og 30 puntos.
Si Ansing Companion miabuno og 25 puntos, samtang ang kanhi USC Warrior power forward nga si Dennis Patindol midugang og 14 puntos alang sa LABA.
Si Celio Repuesto maoy nangu sa NAFBA nga mipabuto og 22 puntos, gisundan ni Raul Miruel, kinsa miamot og 15 puntos.
Ang sentro sa NAFBA nga si Tony Diaz ug ang guard nga si Normie Panilag, parehong mi-iskor og 10 puntos.
Sa laing bahin, si Tito dela Torre miburak og 24 puntos ug Monching Cadiz mibahog og 22 puntos aron pangulohan ang MIBA, kinsa nagbitbit og 1-1 nga baraha uban sa NAFBA.
Si Romy Vasquez, mi-iskor og 18 puntos, si Balbino Canada midugang og 17 puntos ug si Agapito Cabradilla adunay 13 puntos.
Ang BRBA nga anaa sa kinaubsan sa ilang 0-2 nga baraha, gipangulohan ni Dodong Lopez, kinsa mi-iskor og 23 puntos, samtang si Jun Ledesma miamot og 17 puntos ug si Ric Arias miamot og 14 puntos.
Puntos Matag Usa
Unang duwa:
LABA (95) - Yu 30, Companion 25, Patindol 14, Unabia 9, Pangan 9, Seno 6, Lee 2
NAFBA (74) - Repuesto 22, Miruel 15, Diaz 10, Panilag 10, Ragaza 6, Gentapa 6, Flores 5, Misa 2
Ikaduhang duwa:
MIBA (105) - Dela Torre 24, Cadiz 22, Vasquez 18, Canada 17, Cabradilla 13, Adlawan 4, Ramsi 4, Mejias 3
Better Run (77) - Lopez 23, Ledesma 17, Arias 14, Abadejos 9, Albano 5, Abellana 5, Ocanada 4