Naga Motukod og running club

CEBU, Philippines - Naglaraw ang lungsod sa Naga nga mohimo og kaugalingon running team nga langkuban sa mga Naganhon nga mao unya ang padaganon sa mga nagkadaiyang lumba dinhi sa Sugbu.

Agi'g pasiunang lakang, usa ka Fun Run ang himuon karong Disyembre 23 diha sa Naga nga giulohan og "1st Val 2020 Fun Run" diha sa Naga City Hall grounds.

Si event coordinator Hazel Busa, nagkanayon nga ang tuyo ug tumong sa maong lumba mao ang pagkaplag og mga potential runners sa Naga nga maoy paapilon sa ilang running club.

Matud pa ni Busa nga daghang taga-Naga ang mahiligon sa lumba, apan wala kaayo kini makita tungod sa kakuwang sa exposure.

Giawhag usab ni Busa ang mahiligon sa dagan sa kasilinganang lungsod sa pagsalmot sa maong lumba.

Aduna kini registration fee nga P150 libre na ang singlet ug snacks. Niadtong interesadong mosalmot mahimong magpalista didto sa Mayor's Office sa Naga ug sa Vicky Marketing nga anaa nahimutang atubangan sa Naga Public Market. Alang sa dugang mga kasayoran, mahimong motawag sa 2726655 ug pangitaa si Kristine Chiong.

Ang maong lumba gipasiugdahan ni Naga City Mayor Val Chiong uban ni race organizer Joel Baring ug sa Flying Bats Runners ubos sa liderato ni Mercy Green, race coordinator. – BANAT NEWS