CEBU, Philippines - Gipakuratan sa JS Contractors ang paboritong AMBL Enterprises, 85-81 aron masakmit ang kampiyonato sa Punta Princesa Ball Club (PPBC) 2009 Vice Mayor Mike Rama Cup Christmas basketball tournament diha sa Vicente Sotto Memorial Gym sa barangay Punta Princesa, ning siyudad.
Sayong nakakuha’g 29-21 nga bentaha ang Contractors sa opening period ug gipalawman pa ang labaw ngadto na sa 14 puntos sa halftime, 50-36 pinaagi sa hiniusang puwersa nilang ex-USC Warrior Bong Eleazar ug Reginald Taborada.
Apan hinay-hinay nga mikamang ang AMBL aron papason ang ilang 12 puntos nga biya hangtod nga nakatabla pa kini sa makaduha ka higayon, 78-all human masud ang tira ni Danny Lim sa nahabiling 2:05 ug 80-all sa katapusang 54 segundos sa basket ni Abasolo.
Apan, wala sila makasustenir tungod kay nakamugna kini'g mga turnovers sa daginutong oras ug naungot ang ilang iskor hinungdan nga naugkat sa JS Contractors ang kadaugan.
Sila si Eleazar ug Reginald Taborada parehong mi-iskor og 18 puntos aron pangulohan ang Contractors, samtang si Sherwin Lequit midugang og 11 puntos.
Ang beteranong point guard nga si Lito Navarro maoy nangu sa AMBL sa iyang 25 puntos ug si Abasolo midugang og 24 puntos.
Sa sayo pa, ang Cebu Unique Trade mibuntog sa ART quintet ni Arthur Arellano sa iskor nga 92-82 aron angkonon ang ikatulong dapit.
PUNTOS MATAG USA
JS Contractors (85) - Eleazar 18, Toborada 18, S. Lequit 11, Vinalon 10, Vallejo 6, Piliotas 4, Cabunilas 4, Licaros 4, Canencia 3, Tecson 2, Caburnay 2, Empacis 2, Lequit 1
AMBL (81) - Navarro 25, Abasolo 24, D. Lim 12, Y. Alesna 4, Ibona 4, A. Lim 2, Quiroz 2, R. Alesna 2, Sala 2, Ciabo 2, Felicitas 2. – BANAT NEWS