Catmon, 2-0 na sa 5th Governor Gwen Garcia Unity Volleyball Cup

CEBU, Philippines - Mihayag og maayo ang kahigayonan sa Catmon aron mapanalipdan ang ilang korona dihang gipilde nila ang Compostela sa municipal cluster quarterfinals sa 5th Governor Gwen Garcia Unity Volleyball (GUV) Cup niadtong miaging adlaw diha sa Cebu International Convention Center (CCIC) grounds sa Mandaue City.

Yano kaayong gipilde sa gamhanang Catmon ang Compostela sud lang sa duha ka sets, 25-13, 25-12 aron temporaryong mag-una sa torneyo bitbit ang 2-0 nga baraha.

Nakuha ang ikaduhang daog sa Catmon ni coach Vilma Veloso pinaagi sa makusog nga pangatake ug lig-ong depensa nilang Methosheena Bate, Athena Sucalit, Catherine Marquez, Lanie Silvestre, Jerrymie Montalvo, Gretchel Soltones ug Cristy Sucalit.

Sa laing bahin, ang Liloan nakalabang sa kulbahinam nga duwa ug miagi pa kini og tulo ka sets una nila maangkon ang kadaugan batok sa Sogod, 25-15, 19-25, 25-17.

Nakabawi hinuon ang Sogod apan misangko pa kini ngadto sa tulo ka set sa wala pa nila buntoga ang Tuburan, 24-26, 25-15, 25-12.

Laing duha ka teams -- Sta. Fe ug Minglanilla ang mirehistro sab og daog. Ang Sta. Fe mipukan sa Badian, 28-26, 25-17, samtang ang Minglanilla midaog pinaagi sa default batok sa Daanbantayan.

Sa men's division, ang Catmon midaog sab batok sa Sta. Fe, 25-23, 27-25. Ang Minglanilla mimakmak sa Barili, 25-13, 25-17, ang Moalboal nakaipsot sab batok sa Daanbantayan sud sa tulo ka sets, 25-23, 23-25, 25-19.   (BANATNEWS)