Porras mi-iskor og record 62 puntos sa PPBC

CEBU, Philippines - Ang team owner sa Mang Inasal nga si Carlos Porras mikulit ug tournament-record 62 puntos ug nakapasulod og 16 ka three-point shots sa iyang pagmangtas aron baswaton ang iyang team ngadto sa 132-93 nga pagkunis-kunis sa ART team ni Arthur Arellano atol sa pagtapos sa Punta Princesa Ball Club (PPBC) 2009- Vice Mayor Mike Rama Cup basketball tournament quarterfinals didto sa Vicente Sotto Memorial Gym sa barangay Punta Princesa, ning dakbayan.

Ang nahimong record ni Porras malisod na hiapsan sa kasamtangan tungod kay naghinapos na ang maong torneyo ug pabilin kining hinumdoman sa PPBC.

Gikan sa 28-15 nga labaw sa first period, ang Mang Inasal naglabaw lang gihapon og 13 puntos atol sa halftime, 54-41 ug wala na sila mahulga sa kinatibuk-ang second half diin nahubsan gyud sa opensa ang ART.

Si Porras gisuportahan nilang ex-pro Lou Regidor ug Ritchie Garcia sa opensa pinaagi sa ilang 16 ug 14 puntos samtang si Glen Besanes midugang og 13 puntos.

Si Keith Arellano misakiyo og 34 puntos aron pangulohan ang ART samtang si Arthur Arellano midugang og 15 puntos.

Puntos matag usa:

Mang Inasal (132)— Porras 62, Regidor 16, Garcia 14, Besanes 13, Barreto 8, Hernandez 8, Peña 6, Flores 4, Caminade 4

ART (93)—K. Arellano 34, A. Arellano 15, Soco 14, Villarosa 11, Rojas 8, Hapin 6, Libre 5. - Gabby G. Malagar (BANAT NEWS)