Lakers nabaraw sa Jazz

CEBU, Philippines - Gisanta sa Utah Jazz ang 11 ka nagkutay nga kadaugan sa Los Angeles Lakers kagahapon sa iskor, 102-94 sa nagpadayong duwa sa 2009-2010 season sa National Basketball Association (NBA) didto sa Energy Solutions Arena sa Salt Lake City, Utah.

Ang Jazz nakabawos sa ilang kapildehan gikan sa mga kamot sa Lakers niadtong Miyerkules ug mipalambo sa ilang baraha ngadto sa 14-9.

Walo ka sagunson nga puntos ang gipakatap ni Deron Williams sa fourth quarter nga maoy nahimong dakong instrumento sa kadaugan.

Si Williams maoy nangu sa Jazz sa iyang 21 puntos uban ang 11 ka assists samtang sila si Ronnie Brewer ug Wesley Matthews parehong mi-iskor og 19 puntos ug si Carlos Boozer mi- amot og 12 puntos.

Piangon ang tudlo ni Kobe Bryant nga nagduwa kagahapon ug silang tulo si Pau Gasol ug Ron Artest mi-iskor og 16 puntos apan si Gasol mitabla na usab sa iyang career-high 20 ka rebounds alang sa Lakers kinsa aduna nay 18-4 nga baraha.

Tungod sa kapildihan sa Lakers, kasamtangang nag-una karon ang Boston Celtics kinsa aduna nay 19-4 nga baraha human ilang gipanitan ang Chicago Bulls, 106-80 didto sa United Center sa Chicago, Illinois.

Sa miaging tuig, miabot og Game 7 and second round payoff tali sa Celtics ug Bulls apan natagak ang Celtics sa East semis human sila mapidle sa Orlando Magic.

Si Rajon Rondo maoy nangu sa Celtics sa iyang 16 puntos ug 14 ka assists ug sila si Rasheed Walalce ug Eddie House parehong may 15 puntos. Pulos sab mi-iskor og double figures sila si Paul Pierce, Kevin Garnett ug Kendrick Perkins sa Celtics kinsa mi-iskor na og sagunson nga napulo ka daog ug wala pa mapilde sukad niadtong Nobiyembre 20 human sila mapilde sa Magic, 78-83.

Si Derrick mihakot og 19 puntos aron pangulohan ang Bulls.

Sa laing duwa, gipatapsingan sa Indiana ang Washington, 114-113, gikulata sa Detroit ang Golden State, 104-95, gilubong sa Sacramento ang Minnesota, 120-100, mi-rally ang Denver aron pagpukan sa Phoenix, 105-99, naka-eskapo ang Dallas batok sa Charlotte sa overtime, 98-97 ug nakalingkawas ang Milwaukee batok sa piangon nga Portland, 108-101 sa double overtime. - Gabby G. Malagar gikan sa NBA.com (BANAT NEWS)