Ornopia apil sa lumba

CEBU, Philippines - Bisan pa sa kagubot nga miulbo sa Mindanao, wala kini makapaliso sa desisyon ni Siegfred Ornopia, kinsa nag-inusarang mi-asdang aron ipakita ang iyang katakus sa duha ka adlaw nga National Motocross Luzon Visayas Mindanao Competition nga sugdan karong adlawa didto sa Tubod, Lanao.

Si Ornopia, kinsa maoy bugtong rider sa Keiz BJ Racing Team nga nangursong mosalmot mopakita'g aksiyon sa Executive-A division, ang naandam niyang lumba. Iyang banggaon ang mga dekalibreng riders gikan sa nagkadaiyang racing teams sa tibuok nasud.

Mawala hinuon ang kamingaw ni Ornopia tungod kay mokumbati man sab ang laing upat ka Sugbuanon nga sila si Pepo Rubi, Ryan Quirol, Jun Enriquez ug Clark Wagas sa Team Quickflight.

"Makita gyud ang katag sa maong lumba kay pulos mga ngilngig ang nangapil niini," matud pa ni Ornopia, ang nag-unang kandidato alang sa 2009 MS Motosuit Motocross "Rider of the Year."

Si Ornopia mao karon ang nag-una sa oveall standing human sa 14 ka legs sa MS Motosuit Motocross Series nga nakapundo na og 578 puntos. Ang iyang kinamaguwangang anak nga si Earl Jean Brylle, kinsa milumba sa mini maoy nagsunod nga mitigom og 561 puntos.

Mga banggiitang riders nga mokumbati sa maong kompetisyon naglakip nila ni Ted Conde sa Ozamiz, Kimboy Pineda sa Palawan, Jovie Saulog, Glen Aguilar, Dondon Yuson ug Paulo Inoc sa Manila nga molumba sa expert division ug mga riders sa Dimaporo Racing Team sa Mindanao.

Sumala pa ni Ornopia, nga ang tumong sa iyang pagsalmot sa torneyo mao ang pagsukod sa abilidad sa mga riders sa nagkalain-laing racing teams ug ingon man agi'g pagpangandam alang sa labing dakung motocross series dinhi sa Sugbu sunod tuig nga hiniusang pasiugdahan sa MS Motosuit ug Sel-J Sports. – BANAT NEWS