Amores gisugat og daog sa LLBA Christmas League 2009

CEBU, Philippines - Gisugat og daog si Raul 'Magician' Amores sa pagbalik niya og duwa human sa pipila ka bulan nga pahuway tungod sa injury dihang gitumba sa MRS Tigers ang VKK, 67-53 sa nagpadayong LLBA Christmas League 2009 didto sa Villas Magallanes Gym sa Sta. Lucia Property sa Brgy. Basak, Lapu-Lapu City.

Ang MRS Tigers maoy nikontrolar sa kinatibuk-ang duwa ug gani ilang gipakita kun unsa sila kamangtas dihang ilang gilubong ang VKK og 12 puntos sa halftime, 28-16. Nakan-an hinuon ang maong labaw dihang ang VKK sa pagpangulo ni Paquibot milusad og 21-15 run sa third period, 37-43, apan ang MRS Tigers sa trayanggulo nilang Archie Ompad, Jay-R Guido ug Jumao-as daling nakarekober ug sukad niadto wala na kini magpahulga pa hangtod nga nahurot ang oras sa duwa.

Si Ompad maoy topscorer sa MRS Tigers pinaagi sa iyang 13 puntos, samtang sila si Guido ug Jumao-as milawog og 10 puntos matag usa. Si Congsuco miabuno og nuybe puntos ug si Billy Nadado mikambiya og sayes puntos alang sa 4-1 nga MRS Tigers ni team owner Tigre Inot.

Ang pilderong VKK ni team owner Victor Malingin gipangulohan ni Paquibot sa iyang 10 puntos, gisundan ni Dorig nga adunay nuybe puntos.

Sa pasiunang duwa, ang Tango mikulit sa ikalimang daog dihang ilang gipilde ang Boyla, 73-66.

Tulo ka players ang mirehistro og double digits alang sa Boyla ni team owners Dr. Michael Ouano ug Dr. Ryan Ceniza. Si Jimboy Igot miburak og 15 puntos, samtang si Rene Cuadra mibahog og 14 puntos ug si Ouano mi-iskor og 10 puntos.

Ang topscorer sa Boyla Hotel ni team owner Tonton Gilig mao si Gloria, kinsa milansang og 12 puntos, gisundan ni Paulo Villamor sa iyang 10 puntos.

Sa lain pang aksiyon, ang 13R Motors nakatilaw na gyud og daog human nila gipilde ang Ace Penzionne sa iskor nga 76-73.

Si i3R Motors team owner Dandan Ramos maoy nangulo sa kadaugan pinaagi sa iyang 19 puntos, gisundan ni Mario Bancale nga adunay 17 puntos. Ang Ace Penzionne ni Tony Amistad gipangulohan sab ni G. Aying kinsa mipabuto og 26 puntos.

Ang maong torneyo gipaluyohan ni Mayor Arturo Radaza, Mactan Brgy. Capt. Paz Radaza, Harry Radaza, Atty. Rico Amores ug coach Jun Tan.

Puntos Matag Usa

Unang duwa:

TANGO (73) - Igot 15, Cuadra 14, Ouano 10, Jornales 9, Ceniza 8, Augusto 7, Fuentes 6, Gutib 2

BOYLA (66) - Gloria 12, Villamor 10, Tempurada 9, Medina 8, Daluz 6, Asuncion 5, Tampus 4, Hiyas 4, Gilig 2

Ikaduhang duwa:

MRS TIGERS (67) - Ompad 13, Jumao-as 10, Guido 10, Congsuco 9, Amores 7, Nadado 6, Cansuco 4, Gilig 4, Godinez 4, Inot 2

VKK (53) - Paquibot 10, Dorig 9, Llenes 8, Pardillo 6, Montero 4, Inocia 4, Malingin 2, Oyao 2, Malubay 2, Impas 2

Ikatulong duwa:

I3R MOTORS (76) - Ramos 19, Bancale 17, Orque 15, Cadungo 9, Igot 8, Bensi 4, Luayon 2, Espinosa 2

ACE PENZIONNE (73) - Aying 26, Ompad 7, Tampus 7, Patalinghug 6, Lapoja 6, Cañete 6, Decembrano 6, Fausto 4, Cosep 2, Simbajon 2. – BANAT NEWS