Mandaue city gov't mitunol P50,000 ngadto ni Mayol

CEBU, Philippines - Singkuwenta mil pisos ang gihatag sa kagamhanan sa dakbayan sa Mandaue ngadto ni WBC light flyweight champion Rodel 'Kid Rapido' Mayol isip sukli sa kadungganan nga iyang gihatag, dili lang sa maong dakbayan kun dili sa tibuok nasud dihang iyang gilangkat ang WBC belt gikan sa mga kamot ni Mexican champion Edgar Sosa pinaagi sa TKO sa ikaduhang hugna niadtong Nobiyembre 21.

Si Mayor Jonas Cortes mao mismo ang mitunol sa cash incentives ngadto ni Mayol kagahapon didto sa Mandaue City Hall.

Nagkanayon si  Cortes, angay lang makadawat og pahalipay si Mayol tungod sa dakung natabang niini sa siyudad pinaagi sa paghatag og inspirasyon sa mga kabatan-onan nga mas ihatag ang ilang panahon sa sports ug likayan ang mga bisyu.

Sa wala pa siya miadto sa City Hall, si Mayol mitambong una sa usa ka press conference didto sa Chinese Restaurant sa Mango Square.

Si Mayol nagpasalamat   sa mga Sugbuanon nga mihatag og suporta kaniya sa iyang mga away. Ang Pinoy champion mi-asoy nga dili gihapon siya makatuo nga usa na siya ka world champion. Utang usab ni Mayol ang iyang kalampusan ngadto sa iyang promoter nga si Manny Pacquiao, kinsa kanunay   midasig kaniya.

Si Mayol napilde sa duha ka kontrobersiyal niyang sangka batok ni Puerto Rican champion Ivan Calderon. Bisan pa niini, wala gihapon siya kawad-i og paglaum ug natuman gyud ang iyang damgo nga mamahimong world champion.  – BANAT NEWS