Deco Sales ligsan sa Jonel's Trucking

CEBU, Philippines - Padayong wala kapugngi ang pagmangtas sa Jonel's Trucking ni team owner Joey Cal ug ilang giligsan ang Deco Sales ni Mario Gaw sa iskor, 111-102 kaniadtong Huwebes aron pabiling naghupot sa solong liderato sa nagpadayong Barangay Labangon Basketball Association (BLBA) 2009 Christmas basketball tournament didto sa Labangon Sports Complex, ning dakbayan.

Human sa ilang 54-46 nga labaw atol sa halftime, misutoy sa unahan ang Jonel's Trucking ug mikulit og 12 puntos nga abante, 91-79 pinaagi sa pagtimon ni Petoy Mata kinsa mihakot og 15 puntos sulod lang sa duha ka kwarters samtang si Cal mi-iskor og usa ka dosena sulod lang sa second period.

Wala damha, kalit lang mipahigayon og mainitong rally ang Deco Sales ug wala madugay, ilang gitabla ang iskor sa 99-all sa paningkamot nilang Opong Zafra ug Panis Gerali may 3:10 pa ang nahibling oras sa duwa.

Naglabaw sa labing unang higayon ang Deco Sales sa iksor, 101-100 may 2:55 ang oras apan mao kadto'y una ug kataposan nilang paglabaw kay human kini mabawi sa Jonel's, wala na sila makasikit og maayo.

Ang ex-Panther nga si Erik Espinosa maoy nangu sa Jonel's sa iyang 25 puntos ug mihakot si Rowel Sumalinog og 23 puntos samtang si Mata midugang og 20 puntos aron pag-abag sa Jonel's kinsa naghupot na'g 10-1 nga baraha.

Si Zafra moy nangu sa opensa sa Decos Sales sa iyang 29 puntos ug si Gerali miabuno og 21 puntos.

Puntos matag usa:

Jonel's (111)—    Espinosa 25, Sumalinog 23, Mata 20, Villarta 12, Cal 12, Elizondo 10, Quiroz 4, Cabilla 2, De Gracia 2, Castro 2, Navaja 1

Deco Sales (102)—   Zafra 29, Gerali 21, Acapulco 14, Malugay 11, Cabusas 10, Cabaleero 7, Edwin 4, Taboada 4, Briones 2. - Gabby G. Malagar (BANAT NEWS)